قصة الولد ان طاب طيبه من خواله ..؟؟

[ماجد سليمان البلوي]

قصة الولد ان طاب طيبه من خواله ..؟؟


--------------------------------------------------------------------------------


الصبي وان طاب طيبه من خواله... وان تردى فـعلم انهم خايبينـي


أشرب الفنجـال واكـب البيالـة... ان طيـبٍ واحـب سلـم الطيبينـي


[[[السلام عليكم ورحمة الله وبركاته ]]]


من لا يعرف .. هذين البيتين .. بيتين أشهر من نار على علم ..


قد يجهل البعض قائلهما .. ولكن اكيد سمع بالبيتين من قبل ..


حتى اصبح مضرب مثل يتداوله كثير من الناس ..


قائل هذين البيتين ..


الشاعر / راشد بن حسن بن مانع بن رحيان الضاعني الملقب بــ ابن الذيبوقيل انه توفي عام 1986م وهو في نجران وكان شايل معه شخص موصله الى قرية في نجران وحصل عليهم حادث وتوفي رحمه الله ..


راشد بن حسن .. كان يشتغل في شركة ارامكوا السعوديه .. وكان يقود سيارة الشركه ( جمس ارامكوا ) ..
وكان كل ما شاف له رجلي والا طرقي على الخط يبي احد يوصله يقوم ابن الذيب ويوصله بدون مقابل على سيارة الشركه حتى اشتهر عند البدوان لا جا احد يبي يروح مكان ولا عنده مطيه والا موتريمشي في طريقه ويقول عسا يلقاني ( ابن الذيب ) على الطريق والا انا القاه ..


ويشيلني ويوديني للمكان اللي انا ابيه .. حتى قاموا الناس يطرونه ويحكون فيه وهم لا يعرفونه ولا قد شافوه ..


جاء يوم من الايام الا عجوز وعندها غنم تعد على الاصابع و ( راشد بن حسن ) .. كان مشغول ومتأخر على الدوام شوي..


وشاف العجوز وشاف معها غنم تعداها وهملها .. عقب حزت في خاطره واستحى وراعي الطيب ما يجوز عن طيبه وقف الموتر ورجع للعجوز ..


يوم جاها قالها يامره انا ابشيلك وبوديك المحل اللي تبينه لكن بدون غنمك .. انا متأخر على الدوام واخاف غنمك تأخرني زياده ..


قالت له العجوز .. خلاص رح الله يستر عليك ياولدي


انا جالسه هنا انتظر ابن الذيب..؟؟


هو اللي بيجيب العلم وبيوصلني المكان اللي انا ابيه انا وغنمي .. وهي ما تعرفه .. ولا تدري انه
( ابن الذيب ) .. هو نفسه اللي هي تكلمه ..


يوم انصدم ( راشد بن حسن ) بقولها .. وتعجب !!


قال اركبي يا خاله انا ( ابن الذيب ) وابشري بعزك ..


ابوصلك انتي وغنمك ..


وكانت انظمة ارامكو تمنع السائقين ان يشيلو الرجليه اللي يوقفون السواقين ويطلبونهم توصيلهم على طريقهم .. وشلون توصيل الغنم
حتى وصل علم .. للشركه بفعل ( راشد بن حسن ) .. وهدد بالفصل من الشركه اكثر من مره .. وبعض رؤسائه يأسوا من المحاوله معه .. واعجبتهم شهامته..


وصل العجوز إلى منصاها والمكان اللي تبيه ..


وقال هذهـ القصيده .


قالهـا ابـن الذيـب مـن هاجـوس بالـه=كلـمـةٍ يـلـعـب بـهــا والـبــال زيـنـي
قـالـهــا يــومــه طــرالــه مـاطــرالــه= مـن هواجـيـسٍ تشـيـب المرضعيـنـي
حـالـفٍ مـاخـذ عـلـى الطـرقـي ريـالـه= وبـالـثـلاث مـحــرم أنــــه مايـجـيـنـي
لالقيـت اللـي علـى ( السكـه ) لحالـه= يلـتـفـت ويـقــول ويـــن المستحـيـنـي
أوقـف المـوتـر حـيـا وأبــي الجمـالـه= يــوم ولــد الــلاش وجـهــه مايلـيـنـي
الطـمـع فــي كــروة الرجـلـي رذالـــة= خـص وان جـابـه مـجـال الغانميـنـي
والــردي فــي حـالـةٍ مـاهــيب حـالـه= واعـويـنــه مــــن كــــلام الطيـبـيـنـي
الـــردي لـــو بـــان مـايـذكـر عـمـالـه= مـايـعـد الـــلاش مـقـصـور اليمـيـنـي
أركـبــه لـعـيـون مـــن زيـــنٍ دلالــــه= ماتـحـاكـوا فـــي قـفــاه الرامـسـيـنـي
مابـغـى غـيـري وانــا مابـغـى بـدالـه= قـاعــدٍ لـــي بـالـرجـا مـــدة سنـيـنـي
الصبـي وان طـاب طيبـه مـن خوالـه= بـالـخـوال يــســال قــبل الـوالـديـنـي
أشـــرب الفـنـجـال واكــــب الـبـيـالـة= تــابــعٍ سـلـمــي ســلــوم الأولـيــنــي
ولاقـعـدنــا بـالـعـمـل بــنــا الــرزالـــة= نـاخــذ العـلـيـا طــريــق الفـايـزيـنـي
غـرنـي بـعـض الـرجـال بكـثـر مـالــه= مادرى ان المـوت فـي حبـل الوتينـي
كيـف ينفعنـي وابـا(..........) خـالـه= مايـقـوم البـيـت دام الـسـاس طـيـنـي
مـاش ويــنا الـي عـوايـده الجمـالـة = مثـل ابـن ظافـر حـمـد ليـتـه يجيـنـي
الـثـنـا والـجــود دايـــم فـــي خـيـالــه= عـلـمــه ظــافــر ســلــوم الطـيـبـيـنـي
جـــــوّد الـعـلـيــا ولـزمّــهــا عـيــالــه= وادركــوا مــن علمـتـه دنـيـا وديـنـي
واهنـي مـن بـاع حظـه واشتـرى لــه= وسار في درب النبي وأخزى اللعيني
مـوقــفــه مــاكـــل رجــــــال يــنــالــه= مــن بـغـى مـمـشـاه يـقـعـد مرتـيـنـي
كـم ذبـح مـن حـايـلٍ مــن حــر مـالـه= وعـادتـه لـطـمـة خـشــوم العايلـيـنـي


وللمعلوميه هو والد الشاعر محمد ابن الذيب
عسى ان تنال اعجابكم
ماجد البلوي

[عبدالعزيز بن رويحل]

انت ياماجد جمعها كلها من ابوك وخوالك

[بن صقير]

يعطيك العافيه ومشكور ماقصرت

[ماجد سليمان البلوي]

انت ياماجد جمعها كلها من ابوك وخوالك

هههههه
ماعليك زود يا عبدالعزيز
الف شكر
بارك الله فيك

[ماجد سليمان البلوي]

يعطيك العافيه ومشكور ماقصرت

الف شكر يا بن صقير
بارك الله فيك

[سعود السرحاني]

رائع مانقلته لنا

بصراحة كنت أسمع بها

ولكن الان عرفت قصتها وكامل القصيدة


اشكرك ونعم فيك

[ابراهيم ابوساق]

اخي العزيز للتنويه فقط
القصه التي ذكرتها حقيقيه الا ان سبب القصيد ليس بالقصه المذكوره
القصه التي ذكرتها شاع خبرها بين القبايل التي تسكن باديتها من المنطقه الشرقيه الى الخرج ووادي الدواسر ونجران
فكانت سبب في غيرة احد شعراء الدواسر والذي استكثر ان يكون في قبيلة يام رجل مثل راشد ابن الذيب
فقال قصيده سوف اورد ما احفظه منها ويستصغر فيها ابن الذيب ويقول ان لدى الدواسر شخص اسمه ابن حسين
اتصف بصفات ابن الذيب وقصيدة الدوسري منها :

يابن خر الـذيب عـندي لك رساله ،،، عـندنا مثـلك ربـوع طـيبـين
عندنا ابن حسين يفعل ماطرى له ،،، يكرم الضيف وهيف للسمين
ضونا ضوه ودلتنا دلاله ،،،..............................

فكان ابن حسين هذا من قبيلة الدواسر والشيئ الذي مغيب عن اغلب الناس هو ان ابن حسين ؟ خواله قبيلة ال مره من يام وراشد بن الذيب من العجمان من يام
فيخبره راشد في بيته الشهير
الولد وان طاب طيبه من خواله ،،، بالخوال يسال قبل الوالديني
ان طيب ابن حسين ليس منكم فهو كسب الطيب من خواله يام
تحياتي

[المنجور]

شكرا لك على ايراد هذه القصة 0 علما اني سمعتها كما اوردها اخونا ابراهيم ابو ساق الله يبارك فيكم

[محمدسليمان البلوي]

الله يعطيك العافية