خلف (من كثر ماشفت بحياتي من أنذال)

[العشير]

إن كنت تنشد يالمسيكي عن الحال = مالي على كتمانها عنك حيله
الصبر عن بوح الأحاسيس قتال=والبوح في بعض المواقف فشيله
لو كل مايطري على البال ينقال=ما كان شفت إن الثقيله ثقيله

أبطيت أكافح ضيقة البال بالبال=وأدفع بلا هاجوسها كل ليله

لين أقبلة مثل السحابه بهمال=تشفي غليل اللي تزايد غليله

طاحت ولا أوفق من حناياك منزال=وأبطلبك يابدر تكمى المخيله
إن قيل ترعد قل لهم صوت زلزال=وإن قيل تبرق شف لها أدناة حيله
مابي تناقلها هل القيل والقال=وتصير من بعد القصيره طويله

يابدر ماني عال لوصحتي عال=شفني من الصدمات نفسي عليله
أشيل حمل لو يشيلنه جبال=الله وأمانه غير تصبح نثيله

أرمي من هموم الزمن وأسحب أدبال=وأنزل عن الجوكر وغيري يشيله
من كثر ماشفت بحياتي من أنذال=بديت أشك إن النذاله فضيله
ماطاح من عيني رجل طاحوا رجال=وجال يابن حنيف ماهي قليله
أقرب من اللي قالهم ضمن ماقال=ركان بن حثلين راع الجزيله
هذا ولد عم وهذا ولد خال=وهذا رفيق مالقينا بديله

سبحان منهو يابدر غير الحال=وحط الجفى بين الخليل وخليله

هذا الزمن يبغاله لسان دلال=من يستحي هالوقت واعزتي له

وقت به الراعي غدى راعي دلال=كل على طاريه ينفض شليله
ومن كان ساسه للردى مضرب أمثال=اليوم يحسب من كبار القبيله
المال يابن حنيف ملعون أبو المال=ذل العزيز وعز ناس ذليله



الشاعر/خلف المشعان العنزي