إضحك مع مصلح طقع..؟؟

من مصطلحاتنا العربية الجديدة على الساحة .. طقع .. براند نيو يعني ..؟؟

زمان ... لو حدا حكى لصاحبه أنت طقع ...
بيجوز يتهاوشوا .. أو يضربه .... إيش طقع ما طقع ...

بس من جديد ... يعني من ثلاث سنين أربع سنين بس ...

خش المصطلح وبقوة على كلامنا .... ليش ؟؟؟ مين اخترعه ..

إيش أللي أوحى لاول شخص قال كلمة طقع .. انه يحكيها .. بجرأه

وشو خلى الاهبل اللي انحكت له الكلمه ينبسط ويعرش عليها ..
وينشرها بين صحابه الاهبل منه
على أساس انها مدح وليس ذم ..

الحلو أن المصطلح مش موجود الا عندنا ....

يعني لو تروح على أي بلد عربي ...
وتمسك واحد بالشارع وتقول له .... انت طقع ...

واذا في سوريا راح يحكيلك " لاك شو طئع ما طئع ... استحي ع حالك "

واذا في لبنان " يع .. ليك أرف يئرفك شو هيدا الحكي... "

في العراق " عيني اش هذا اللي تحتشي فيه ... عيب عليك يا معود "

في مصر " انا ما شميتش أي حاجه ... وما عملتش حاجه "

في السودان " يا زول عليك الله ايه الكلام ده .. انا ما داير اعمل طقع "

وهلم جرا ... بلاش نجردهم بلد بلد ...

هــــــــــــلاّ تعال بالأردن احكي لواحد أنت طقع ....

" ها ها ها ها هااااا هااا هاااا ..
يا زلمه انت من الآخر ( هاي بدها موضوع لحالها كمان) ...
هات طق كفوف "

وطق الكف .. لازم ييجي بعد كلمة طقع ...
عشان الاكشن .. واكسسوار حلو مع الكلمه ..

كل شي عندنا الا طقع ....

كيف التشكيله الوزاريه الجديده ...... أما اسكت .. طقع
سمعت آخر اغنيه لهيفا (( احم احم )) ....
آه يا رجل .. طقع ...
كيف فيلم امبارح على تشانل تو ... اشي طقع ...
كيف العطله بكرة .- قصدي امبارح ...... طقع

يعني كل الاشياء الحلوه في حياتنا تحولت الى طقع في طقع ..
نعم حلوه حياتنا في ظل هــ الاطقاع المتعددة الاغراض ....
ولكم تحيات
ماجد البلوي