ياذيب

:

:

* ياذيب قلّي .. وينك اليوم ياذيب
.................... جيعان .. وألا نعتبرها لكاعه

* بالصبح ترقب فوق روس المراقيب
.................. وبالليل تذبح 6 في ثلث ساعه

* ياذيب خصمك .. ضاري لمدة الطيب
................. لو تطلبه .. مايتركك للمجاعه

* يعطيك لمّا تشبع بدون .. تخريب !!
................ وعطاه يبذل فيه قدر إستطاعه

* لكن كذا ياذيب .. والله ترى عيب
............... ذبحك بتال الليل .. ماهو شجاعه

* أزعلتني وجروح قلبي معاطيب
............... تسرف بذبحك دون هم وقناعه

* رديت نفسي عنك .. خفت العذاريب
............... خفت البشر لاتقول هذي .. فضاعه

* ورديت عنك إرجال لاقالت .. تجيب
............... ماهمّها عرض الجبل وإرتفاعه

* اهل البنادق .. واللقا .. والمواجيب
.............. أخوان .. وأيضا اصحاب .. وايضا جماعه

* لو كنت مستامن .. وبين الشخانيب
.............. وبين الوحوش وبين ذيك السباعه

* جرّوك قبل الشمس لاودها تغيب
.............. ولافيهم ألي منك .. شمّر ذراعه

* والحين يمّا تكف .. عنّا المخاليب
.............. وألا يجيك العلم .. في ثلث ساعه

أسعد السحيمي