منيف منقرة وسعيد إبن رحمه

منيف منقرة

أول الليل رووح وأخرة إبتدا
إسم فيه الخبر قبل الخبر مبتدا
مير يالله تهدينا نهار الهدا
من يصدق كلامك ياقناة الجزيرة

الليله الليله سواليف وعلوم = لاما الجمل شعلان يعرف مصيرة

قلت لك يبن رحمه كيف حال السياسة
قلت لي السياسه مع رجال الرياسة
والسوالف تجي مابين كرسي وماسه
من يصدق كلامك ياقناة الجزيرة

ون قدر الله نطحوا القوم للقوم = الطيب اللي يعترض للمغيرة

سعيد إبن رحمه

يامنيف انت تمشي لك مسافة طويله
مابقى معك حيل ولا بقى معك حيلة
والبلا لو يحطونك زعيم القبيلة
من يصدق كلامك ياقناة الجزيرة

اللي يعد الصدق يسلم من الوم = والاوله ماهي بمثل الاخيرة

السياسة معا حكام ستت كراسي
منت شاعر سياسي منت حاكم سياسي
بس خل السوالف بين راسك وراسي
من يصدق كلامك ياقناة الجزيرة

انا أشهد ان الناس نعطى ومحروم = يالشاعر اللي قام يشعب بعيرة

منيف منقرة

ويش نبغى إنتسمع غير علم الاطاحه
مرح الشيخ لاكن مالقوه بمراحه
أول العمر يتعب وآخر العمر راحه
من يصدق كلامك ياقناة الجزيرة

لا والله إلا صار في جوك غيوم = جتك الكبيرة قلت هذي صغيرة

انت راسك من أول طاحنه يبن رحمه
مير ما كل بيضه تشوفها تقول شحمه
أول العمر زحمه وآخر العمر زحمه
من يصدق كلامك ياقناة الجزيرة

لا والله إلا العقل والرزق مقسوم = ومن ياكل الليمون يشرب عصيرة

سعيد إبن رحمه

الاطاحه سمعناها بعلم الاذاعه
جعل ربي يطيحك من قبايل قضاعه
انت واحد لكيع ولاتكب اللكاعه
من يصدق كلامك ياقناة الجزيرة

الطير أبو جنحان ما يترك الحوم = يصبح بديرة ثم يمسي بديرة

يا عسى الله يرحمكم ويرضى عليكم
القبايل تراها كلها ما تبيكم
ياعسانا نشوف السلسله في يديكم
من يصدق كلامك ياقناة الجزيرة

ملزوم أطوعكم على العهد ملزوم = وأقطع خبركم من قناة الجزيرة

منيف منقرة

يوم هذي علومك رووح منت بفايز
الدعا يبن رحمه من نصيب العجايز
جيت أبا اكرب على المسمار وأثريه بايز
من يصدق كلامك ياقناة الجزيرة

اليوم لا ظالم ولاني بمظلوم = يوم إبن رحمه باح كل السريرة

القبايل يحبون الضغيف لأنه
كل ماداسو إله شوي يجتر ونه
خلوا الجنه إله نار والنار جنه
من يصدق كلامك ياقناة الجزيرة

لا والله إلا طيور وصقور ورخوم = وكل الدعاوي كل أبوها يسيرة

سعيد إبن رحمه

انت راعي مشاكل ما تكب المشاكل
حيتن في جيوب الناس تشرب وتاكل
إقطعوا وإعقبوا ياسايقين السياكل
من يصدق كلامك ياقناة الجزيرة

كم من عجوز تفرك خشوم وخشوم = ورجال مايسوون حبة شعيرة

انت شاعر بلي والمشكله جات صوبك
لنك اللي تلبس ثوب ماهو بثوبك
مير راجع حساباتك وحسب ذنوبك
من يصدق كلامك ياقناة الجزيرة

يافيل يلي مامعك غير خرطوم = خرطوم متلوي وأذاني كبيرة

منيف منقرة

انته اللي تبا تقطع وتخسى وتعقب
والله إني كشفتك مالك أيات مهرب
أنت جاسوس مابين الناس تاكل وتشرب
أرسلوك إلبلدنا من قناة الجزيرة

ماتحكم إلا مثلكم شكل وهدوم = وأميركم تحكم عليه الاميرة

قد نصحتك لا تاقف للقوي ياضعيف
منت شايل ثقيل ولا إنت شايل خفيف
مير هالحين جتك الكيفه اللي تكيف
من يصدق كلامك ياقناة الجزيرة

أنا نكبت الترك والفرس والروم = ما تعرف الرجال شرة وخيره

سعيد إبن رحمه

ياحفيد الامارة مانت كفو الاماره
حن يمين الطريق الذرب وإنته يساره
ياخسارة نسولف مع خبل ياخسارة
من يصدق كلامك ياقناة الجزيرة

أميرنا يختم على خشمك ختوم = مير إطلب الله بالستر والستيرة

وسلامتكم

وإعذروني إن حصل فيه خطأ

انا أشهد ان الناس *نعطى ومحروم = يالشاعر اللي قام يشعب بعيرة

انته اللي تبا تقطع وتخسى وتعقب
والله إني كشفتك مالك أيات مهرب
أنت جاسوس* مابين الناس تاكل وتشرب
أرسلوك إلبلدنا من قناة الجزيرة

يعطيك العافيه اخوي ثامــر

تعديل الأولى بدل نعطي(معطى)
والثانيه بدون (ما)

ثامر

ما يجي منك غير الجزل


بيض الله وجهك