مملل وغثيث وتصر على اطباعــك !!!

اسعد الله اوقاتك اخوي سعود
الغثيث والسامج مصطلحات نبغا نركز فيها شوي
كثير منا يقول او سمع احد يقول وش هالاكل السامج ! يعني مافيه لاريحة ولا طعم ( مافيه ملح )
والغثيث هو النحيف الهزيل او الي ماله فائدة واستخدمت الكلمة في تفسير زبد البحر في قوله تعالى
( فأما الزبد فيذهب جفاء وأما ما ينفع الناس فيمكث في الأرض كذلك يضرب الله الأمثال ) وعكسة السمين النافع
نرجع لموضوعك اخوي سعود
اللي اشوفه ان الحكم على الشخص بكونه سامج او غثيث او ممل يختلف باختلاف تقبل الناس له ، يعني ممكن انت تشوف ان فيه انسان يتصف بهالصفات وغيرك بالعكس يشوف انه خفيف دم ومزوح ومرح ، والا ما كان شفت انه فيه شخص يقول لك وش رايك نروح لفلان وانت تقول وش تبي بهالسامج
هو ما شاورك الا انه يشوفة بعكس ما تشوف انت والا ما جاء على باله يشوف وجهه خير شر
وأحياناً اشوف ان الانسان يتأقلم مع الوضع الحالي اللي هو فيه لاجل يبتعد عن هالصفات
مثلاً واحد طالع البر مع أخوياه وقالب الوضع رسمي بحت اكيد الكل بيقول سامج والي يسولف وينكت ويمزح بنقول يازين خوته
لكن لو كان بنفس الحالة رسمي بس في مقر عمل او مقابلة مهمة بتقول ما شاء الله عليه رسمي ومعطي الامور حقها وماخذ الامور بجدية ولو جلس يمزح وينكت الكل بيقول وش هالغثيث
بالتالي المفروض على الانسان يتكيف مع الوضع الحالي او المكان الي هو فيه ويعطي الامور نصابها لا يكون رسمي لدرجة التجمد ولا مزوح لدرجة " الخبال" يسيطر ولا يخلي جانب يغلب على جانب ثاني وكله في سبيل كسب محبة وقلوب الناس الي حوله
اعتذر عن الاطاله وكل الشكر لك

أبو مروان

الله يسعدك
بإختصار أعتقد أن مثل هذا الشخص غير واثق من نفسه
و ضعيف الشخصية

و الحل معه هو نصحه ، ثم نصحه

و إن لم يتعدل إما يُترك أو يبلع على علاته ،
سيما إذا كان قريب أو صديق

أحيانا يبتليك الله بغثيث

لكن تجنبه وتجنب الديره اللي هو فيها وريح راسك

ما أنت فاضي تعدل عيال خلق الله

الغثاثه صفه ملاصقه للأنسان وجبله جبل عليها ومن المستحيل تعديله

لكن الحل الابتعاد عن واديه كله

تحيه لك أبو مروان


وقبله على رويس الرجال اللي انت خابر
هههههههههههه


مخمخ مع هالقصيده

بعض العرب دمه ثقيل
...................... كنك معه في مقطعه
اثقل من جبال السراه
..................... وشعابها المتفرعه
اللي يبي تكفير ذنب
.................... يجلس ربع ساعه معه
الثانيه في حضرته
.................... مثل سنه في قوقعه
تضيق بك وانته معه
................... كل الجهات الأربعه
موهوب في رسم الطريق
................... للضيق من عقب السعه
ومن ثقل دمه يعتقد
................... مواهبه .. متنوعه
ليا ضحكت مجامله
................... يفكر انك تشجعه
ان قلت عاقل محتمل
.................. وفيه احتمال انه امعه
بس الأكيد ان الحظيظ
.................. مايبصره ..ما يسمعه
لو تحذفه وسط البحر
................. يجيك بكره يدفعه
ويقول انا لاأستطيع
................ ان اهضمه .. ان ابلعه
شوفه يسبب لك شعور
................ ان الحياه مروعه
وان الليالي مقفيه
................ وان السنين مودعه
وان الطيور الطايرة
................. لابد يوم موقعه
وان النهاية مؤسفه
................ تحت تريله مسرعه
لو تذكر اسمه عند ذيب
................ تجيه اعاقه ف أربعه
على الهوا يعطي دروس
............... وقتك شلون تضيعه
هو مخترع سم الكبود
............... ومورده من مصنعه
ويحط لمساته عليه
............... ويغلفه .. ويوزعه
أشك في ثقب الأوزون
............... انه تسبب وفقعه
وانه سبب حرب الخليج
.............. واساس كل الزعزعه
ويمكن لو انه يلتفت
.............. للنيل وقف منبعه
ولو يلتفت يم القمر
................. يمكن يغير موقعه
جلسه معه وهو نشيط
.................. ياعنك ما هي ممتعه
امه خذت مقلب كبير
.................. ترجي وراه المنفعه
لو انها عنه درت
.................. من بطنها ما تطلعه
او انها يوم بلشت
.................. من ثديها ما ترضعه
الله يفكه من بلاه
................. ولاّ انه عنا يقلعه
ولاّ انه يسلط عليه
................. ويطيح له ف مقلّعه
تعلمه كيف الأصول
................ ان طاع ولا تصفعه
الناس ماهي فاضيه
................ للشوشره .. والقرقعه

الله يعطيك العافيه

تعجبني مواضيعك يابو مروان

وانا اتفق مع الاخ فواز

كل الشكر على الموضوع الرائع

الله يعين ياأخي سعود
واللي يزيدك غم ويقتلك هما,وهو عندما يستظرف هذا الغثيث والممل
نفسه,ويتحرى ان الحاضرين يستوحشون للسمر معاااه
وتلقاااه يتعمد يغيب يوم او يومين,ثم يعود والسؤال الذي يلوح في ناظريه
هل أشتقتم لمجالستي؟؟؟
عاااد هااذي قاصمة الظهر والباقعة والحالقة
بس بيني وبينك الحديث عن الثقلاء خفيف على خلااف الحديث معهم
وأرى ان الأنسان عندما تجده متقلب من شخصية الى شخصية
فهذا يعود لعدم الثقة في النفس
ومن هنا تهون عليه نفسه,فتراااه يبيعها في كل مزااد علني,أيا كان ميوله
تلقى كلامه مكرر حديثه مكرر,تعيفه بجد
مرااات تتمنى ان يخلعون ضروسك بلا مخدر ولا تتحدث مع غثيث

يعين الجميع

صدقت أخي الكريم

شكراً على اضافتك المتميزة

وصف عنيف خلع الضروس

شرفني تعليقك

وافر التحية والتقدير