رحلة سفر

ياوجودي وجد من داهموه بلا دليل=وحطو بيدينه القيد والتهمه أرهاب
أربع سنوات مابين تعذيب وعويل= وغربه وفقر وبهاذ يل مع بعد وغياب
ولا كفيل يكفله لو يدور له كفيل=تهمته لو هو بري من عظيمات الصعاب
ونطلق من بعدها بعد ذاق ألفين ويل=وصورته فى المجتمع ماتسترها الثياب
مثل حالي حالته يوم همه مستطيل=وانا لي عدة سنوات فى هم وعذاب
خابت الآمال الا بوجهك يالجليل=يااله الكون يالله ياجزل الثواب
صكت بوجهي أبواب البشر وانت الكفيل=كل ماصكو الناس باب تفك باب
يالله يالمعبود ماأرجو سواك ويستحيل=أخضع لسواك أو أتخذ غيرك أرباب
أبرأ من الشرك واعيذ بك عبد ذليل=يرتجي عفوك ويخاف من يوم الحساب
ياألهي مالي الآأنت يالرب الوكيل=ومؤمن بأن الدعاء ياألهي مستجاب
مارجيت ألا أنت مادام ضاقبي السبيل=يالله أفزعلي بفزعتك يامنشي السحاب
ومن بعدها راكبلي اللي على أخر موديل= كامري بحري ليا دز يلحقك السراب
مع طريق خابره خبر مابغالي دليل=بيني وبينه علاقة صداقه وأغتراب
الطريق اللي يودي ولو خطه طويل=حافظٍ منه المدن والقرايا والهضاب
أشمل عن العاصمه واسرى بجو عليل=بعد ماخذ زهابي عجل لكن زهاب
وكل ماطال المسرى قمت أكن من السبيل=أحرق بقلبي جروح وازيد بها ألتهاب
ومر في سدير وجلاجل وعقبها بليل=ديره يذكر بأهلها مراجل واكتساب
وعقب على المجمعه وقل سلام ولا تحيل=ياديار تكرم الضيف في يوم السغاب
وانزل مع الغاط ديرة مكملة الجميل= السدارى اللي لهم بالوفا علم وجواب
ومر فى القصيم ديرة هل الطيب الجزيل=أهل الطولات والدين حفاظ الكتاب
ومر دار عقيل ومن هم مايعرف عقيل=أهل الرحلات والطيب والعيس النجاب
ومر بالعقله على أيمنك طيب وريح هيل=عندهم للمرجله علم واخبار تجاب
ومر مع وادي الرمه وادي الحب ألآصيل=فيه علم المراجل وقطرات السحاب
وقل لاهاليه التحيات مروية الصقيل=يابني رشيد ياهل الوفا ولآحتساب
ويارجال الحرب ياحرب يانار الفتيل=ياسلامي ياأهل المجد مروية الحراب
والحناكيه يمينك وماها سلسبيل=وكل تاريخ الهوى في ديرها له أسباب
والصويدره من بعدها تجيك ولاتطيل= ومن بعدها أنزل بدار الرساله والصحاب
المدينه ديرة العز والمجد الآثيل=ديرة مامثلها بالديار ولا تساب
طلعت منها على الناس شمس ماتزيل=ولا لها مهما يطول الزمن أسم أحتجاب
وصل فى المسجد وسلم على ذاك النزيل=الرسول المصطفى و الشفيع المستجاب
وحرك لدارً ربتنا وحنا مستحيل=ننكر المعروف أو نرخصه ذاك التراب
والمليليح أيمنك ويسرك جعله يسيل=ديرة فيها مع الطيب علم مستطاب
والثمد والصلصله دار مشفية الغليل=خلها يمناك وانزل بدارك ياشباب
أنزل بخيبر عساها لبراقٍ يخيل=عدة أيام وليال يساقيها السحاب
واشرب الففنجال عند أشقر يعطي الجزيل=عند حمدان بن حماد معسول الجواب
والدي فيه أفتخر ساعة يردي البخيل=مكرم الضيفان من خوف لابكره يعاب
ومن بعدها أروح لحسام واخته وستميل= خافق ينطر رجوعي ليا طال الغياب
وتهنى كم نهار واعرف أنه قليل=مجلسي فالدار واذكر ذهابي والآياب
وانتهت رحلة سفر عرفت خطٍ طويل=بين هم وحزن وأفراح وأتراح وعذاب

آآلله علـيـك

صح السانك

ولاهنت

قصيدة عز الله جزلة

وبيض الله وجهكـ

والحمد لله على السلامة

رحلة موفقه

يعطيك العافية وسلمت

ننتظر منـكـ المزيد من الابداع

دمتى بخير

شاهيــــن النوايف ..

مـا أروع ما تخطه لنا بنانك

معاني كاللؤلؤ نثرتها على صفحاتنا لتعطيها رونقاً وجمالاً ..

أطيب المُــنــى ،،

سلمان العرادي

شاهين النوايف
الحمدلله على سلامة الوصول
وانعـم فيك وبـوالدك اطال الله عمرة

لك تقديري واعجابي

اخي الشاعر الكبير شاهين النوايف محمد
تحيه لك من القلب
صح لسانك مليون وانار الله طريقك والله انها تستحق القراءه مرات ومرات لمافيها من الدرر الثمينه0 والا اقول الا بيض الله وجهك وسدد خطاك بعدين ليه ماواصلت للعلا الام وكما قيل من يريد العلا مسك خط خيبر ولوني اعرف مال خيبر عندك من محبه كونها المسكن ولكن هنا المرجع 00 سلمت وبارك الله بك والله يعطي والدك طولت العمر

أخي وزميلي شاهين النوايف ( أبو حسام )
قصيده جزله من شاعر جزل
واسأل الله العلي القدير ان يسهل دربك وأن يتحقق مبتاغك عاجلاً
وربما احتاج الأمر إلى وقت طويل قبل أن يتحقق مبتغاك ولكن مع الإصرار و دوام المحاولة و المصابرة يزول كل شيء
تقبل مني فائق تحياتي,,
صقر النوايف