للرجال فقط -ممنوع دخول النساء

السلام عليكم ورحمة الله وبركاته
أحبتي / تذكرون الموضوع السابق (للنساء فقط ممنوع دخول الرجال)
اكيد تذكرونه .........
فخفنا من زعل الجنس الناعم علينا وقلنا من باب العدالة لازم نرضي الطرفين

والآن خلوكم معنا في موضوعنا الجديد

فلان بن فلان وبلاش نقول اسمه ..... (( الستر زين ))

يعمل بوظيفة مرتبها ثلاثة الاف وفراطة جاله ابوه وقال ياولدي ابغى منك عشرة الاف

ريال تراي بحاجة الى سيارة . قال الولد المعذرة بابوي ماعندي فلوس ورجع الشايب مكسور الخاطر

وبعد ثلاثة شهور جت له امه تعبانة وقالت ياولدي ابغى منك الفين ريال على شان اتعالج

عند طبيب خاص .. رد الولد وقال ماعندي .... رجعت الأم مكسورة الخاطر (( وحسبي عليه الله من ولد ))

وبعد مدة ليست بالبعيدة خطب الولد من احدى الأسر وحدد الفرح

والتمو عليه صحبته الموقرة وقالو له لازم تحيي فرحك ما تخليه كأنه عزيمة عادية ........

لازم تجيب شعار يحيون العرس

قال ماعندي فلوس . قالو خذ هايلكس من المعرض قيمتها ثمانين الف اقساط لكل شهر الفين ريال وتبيعها بخمس واربعين الف ....

راح المسكين وشرى السيارة وحجز القصر بخمسة عشر الف واتصل بمكتب الشعار وقال :

ابغى شاعرين لعرسي وحدد القصر والموعد قال له صاحب المكتب حدد الشعار اللي في بالك . قال : ابغى صياف الحربي . قالو توفى . قال محمد الجبرتي . قالو توفى . قال الثبيتي . قالو توفى .قال له راع المكتب انت ماتعرف عن الشعار أي شئ .. لكن اتركنا نختار لك . قال :

موافق . قالو: ادفع ثلاثين الف ريال . ودفع المسكين المبلغ كاملاً .
وجابو له اثنين من الشعار المبتدئين وعطو لكل واحد الفين ريال وممكن لو قالو بلاش جو لأنهم يبغون اللعب

وقامت الملعبة والا اللعب شرق واخوانا الشعار غرب وانتهت ليلة الفرح وخسر المسكين فلوسه وتذكر الأقساط وايجار الشقة والفواتير وابوه وامه وصابته حالة نفسية .عسى الله يكون بعونه
.
.
.
.
ياسادة ياكرام كثير في هالمجتمع على شاكلة فلان اللي
ماوجد بعد عرسه الا الدين وعقوق الوالدين واهل العقول براحة

وعفوك يارب

الكاتب القدير // فالح عائض السميري


جزاك الله خير الجزاء .. وجعلها في موازين حسناتك ..


والله أني أفكر بـ كل عقلانية كيف برجل يرد أبوه أو أمه ؟ ياويل قلبي عليهم ..


ونسال الله أن يجعلنا من يخدمهم ويقدم لهم كل ما يردونه له ..


فذكرتني في احد أصحابي كان راتبه 4500 وكان مديون فقال له أبية نريد ان نشتري

الأرض الفلانية فقال ابشر يابوي بكره وهي عندك في نفس اليوم تسلف 20 واشترى

الأرض كذلك في نفس اليوم .. والله بعدها بكم سنه تعب الشايب والله ثم والله إن

هذا الابن حجج أبوه على كتفيه وكذلك انه يروشه وأنهم طلعوا من دورة المياه ( الله يكرمكم ) أمام عيني ..


وبعد ماجاب أبية إلى المجلس فقال أبية ( ياولدي يالله ترزقك بولد مثلك وترزق من حيث مالقيت )


والله الآن هذا الشاب يملك عمارة جديدة وسيارة جديدة وكذلك عنده الخير الكثير

فهذا من فضل الله ثم من رضا الوالدين ..


فالله الله عليكم برضاهم ..


فعذرا ياعزيزي على تحويل مقالك من موضوع الزواج إلى فضل رضا الوالدين ..


وكل الشكر لك ودمت بخير وعافية

موضوع اكثر من رائع

هي معاناة كثير من شباب ونساء المجتمع

ومنهم محدثتكم لي الآن 14 سنة متزوجة ولا زلنا نسدد اقساط الزواج

ليس لشيء فقط لان امه واخواته يريدون فرح لا صار ولا استوى .....!

والنتيجة :

ديون وغرقانين فيهاا

أخوي ابو عايض موضوع أكثر من رائع

وبر الوالدين له ابواب كثيرة وتذكر أهم شيء

وهو ماتفعله الآن بوالديك سوف يفعله بكَ أبنائك ،

الإشكال أخي المبدع / فالح السميري .

ليس في كون هؤلاء الشعراء مبتدئين وأن لعبهم في جهه وهم في أخرى.

الإشكال في تلك المصاريف الّتي تصرف بغير وجه حق وخاصة على التهريج سواءًا أكانوا شعراءً كبارً أم صغار مع بالغ الإحترام للإخوة الشعراء .لأن الشعر لافائدة منه لصاحب المناسبة .

فهل يعتبر وجود الشعراء في تلك الحفلة أو الزواج دعاية للحضور ؟!

إن كان مقصد صاحب الزواج هو هذا ؟ فالعوض على الله .

من لم ياتي إلا لأجل وجود محاورة وان الشاعر فلان فيها (فلا مرحبًا به) إن كان من الجماعه .

أما الحضور من الخارج فلا يضربوا لأهل الحفل بالاً .

فالعتب كل العتب على من يتبع أمور لاتنفعه وخاصةً ليلة زواجــه
/
كلّنا نشاهد هذه الأفراح الّتي تتعدى مصروفات العريس بها (80) ألف بدون مردود يستفيد منه .
/////////////////////////////////////////
وبالنسبة لرضا الوالدين . فإن الله سبحانه وتعالى لم يأمرنا برضاهم !

كل التقدير والإحترام لك أخي الغالي.

والسلام عليكم .

،

* من يريد التوضيح فليطلب مني ذلك !

،

صراحة موضوع يحكي الواقع والمشكلة اللي يكلف على نفسة وهو ماعندة

كلة عشان الناس يقولون عرس فلان مامثلة انت ماعليك من الناس اهم شي

رضا اللة ثم الوالدين وتكون على نفسك بصيركل شي بعقل اتمنى واللة ان الشباب ينتبهون

خاصة الايام هذة بدت الامور تصعب والاسعار ترتفع اللة يوفق الجميع