قصيده: البارحه مثل النبشتي على الباب

هذه من قصايدي احببت عرضها عليكم عسى ان تنال اعجابكم وذائقتكم
000 0 00 ((النبشتــــــــــــــــــــــــــــي))0000 0 00
البارحه مثل النبشتي على الباب=طبق عليه المستلم بالخفاره
ماهو شنب حتى يجي صف الاشناب= حضه رمابه عند باب الزياره
ماله جدى الا عضة الناب بالناب=الحظ الاقشر بان بأول نهاره
الحظ الاقشر ويش ودى وش جاب=غير التعاسه والقهر والعزاره
الحظ الاقشر كنه اشراع دباب=تومي به الارياح في كل حاره
الحظ الاقشر بس يلعب بالاعصاب=حتى يخليها سوات الخباره
ان قلت له وش فيك قال السعد غاب=ربحه قليل ومعطيا بالخساره
وانا من الايام والوقت منصاب=وغديت في دنياي مثل الصهاره
توي صغير وعارضي ياعرب شاب=ولاتنفع الشاطر فنون الشطاره
كنت احسبا الوقت ماهو بلعاب=يعط الحقوق الهينه والكباره
اثر الزمن غادر وكاذب ونصاب=كم واحدا صفاه واخلا دياره
وكم واحدا حده على ديار الاجناب=ومن التعب تضرب يمينه يساره
ان طاب له والا على غير ماطاب=ماله عن المقسوم لو به نعاره
الاجل والارزاق في حكم وهاب=مدبرن خلقه وعالم مساره
كلا يسر ولكن يوجد له اكتاب=وليا قضى اكتابه تبين قراره
وحنا عرب ضد التطرف والارهاب=الجار منا عيب يغدر بجاره
فينا الكرم والدين ونحل الانشاب=وفينا الشرف ميراث ماهوتجاره
لكن ليا غرنا على خيل وركاب=عدونا نسقيه كاس المراره
ناخذ حلال القوم ونهدم الاطناب=وعدونا مايشب ضوه وناره
عدونا يصبح ذليلا ومرتاب=وتشوف بعيونه دليل انكساره
حنا بدو حنا عريبين الانساب=وش دخلنا بالعولمه والحضاره
ياجاهلا فينا تبا تشوف الاعجاب=زور البداوه في حياتك زياره
تلقاء بيوت مشيده كنها اهضاب=فيها الكرم فيها العلوم الخياره
فيها دلال البن والهيل ينساب=والبن خالط مع شقاره حماره
وسوالفا تندار مابين الاصحاب=والكل تفهم هرجته بالاشاره
مابينهم جاهل وفاشل وكذاب=بدو بدو رمز الوفاء والطهاره
والله يجنبنا البلاوي والاسباب=ونعيش حاضرنا ونجني ثماره
تمت وصلى الله على سيد الاحباب=المصطفى المرسل لنا بالبشاره
وسلامـــــــــــــــــــــــــــــــتكم

ابو عاطف

صح لسانك وسلم بنانك على هذهـ القصيده الرائعه

وما هو غريب عليك هذا الابداع

دمت بهذا الشموخ ايها العذب



تحياااتي لك

محمد الرموثي,,,

وحنا عرب ضد التطرف والارهـاب=الجار منـا عيـب يغـدر بجـاره
فينا الكرم والدين ونحـل الانشـاب=وفينا الشرف ميـراث ماهوتجـاره
لكن ليا غرنا على خيـل وركـاب=عدونـا نسقيـه كـاس المـراره

ابوعاطف
قمه هذه القصيده
صح كلك
ومانعدمك ومانعدم ابداعاتك ان شاء الله

ولك كل محبه وتقدير

عبدالله

ابو عاطف


صح لسانك دائمن مبدع

ودمت بهذا الشموخ

ابو عاطف
صح لسامك ايها الشاعر العملاق

\الشاعر الغالي ابوعاطف\امتعتنا وافدتنا وعلمتنا القصيده رائعه وانت اروع ورب الكعبه فما اجملك ايه الرئع ومااجمل مانثرت

\من صور وشواهد قويه جزله رائعه وصادقه فيما توضحه وتدافع عن المسلمين عن التهمه التي بريء الاسلام دين الرحمه والعدل والحق عنها\وتحدثت عن جوانب من الشجاعه والبساله والقوه لدى المسلمين
\\محبك ابوسامي \