وصية أب لإبنائه

السلام عليكم ورحمة الله وبركاته

أحببت أن تكون أول مشاركة لي في هذا القسم قصيدة عبارة عن نصيحة من أب لإبنائه وليس أخلص من النصيحة عندما تكون بهذا الأتجاه وهي للشاعر الصامت ( محمد بن سالم بن عواد التلفيه الرموثي البركي البلوي ) آمل أن تحوز على رضاكم .

البارحه قمت اتفكر بالحرام وبالحلال = وصليت بالمسجد وقمت اقرا رياض الصالحين
والحمد لله بان نور الحق ما فيها جدال = واللي تحرى الطيب يلقى الطيب عند الطيبين
لكن من احداث الليالي جا على بالي سؤال = ابغى اوصي عيالي عسى ربي على الدنيا يعين
ياعيالي انتم راس مالي والوصية راس مال = ترى وصاة الاب لازم يعتني فيها البنين
امسك ياسلطان الوصاة أنت الكبير من العيال = والى كبر زايد وخالد عطهم العلم اليقين
ترى العمر لو طال ياسلطان قافيه الزوال = اوصيك بالاخلاص والتقوى وبر الوالدين
اخلص عملك لوجه ربك واجتنب قيلا وقال = واحفظ لسانك قبل لايرميك في وسط الكمين
صل الصلاة بوقتها واشرب من المي الزلال = واليا سمعت مطوع الحارة يؤذن قول آمين
صوم رمضان وحج مكة يوم شديت الرحال = وادفع زكاة المال للمحتاج او للعاملين
واوصيك عن كثر الجدال بمجلس اكرام السبال = والى جلست بمجلس اهل المعرفة خلك فطين
كثر الحكي والضحك يسمج صاحبه علماً يقال = قالوه عطران اللحا لعيالهم من هالسنين
واسهر على كسب المعالي والهدف صعب المنال = ترى الولد ماله وجه من غير علم وغير دين
واوصيك لاتمشي مع اللي دربهم ماهو عدال = واجلس مع الصالح ترى الاقران في حكم القرين
وابعد عن اهل الغدر واهل الكذب واهل الاحتيال = ترى الولد في نيته يغلب على ابو نيتين
واحذر من اهل الغش وارباح الربا سحت وضلال = مال الربا لابد مايفنى لو انه بعد حين
واوصيك لاتشهد شهادة زور تطرحك النعال = والحق يرضي طالبين الحق واشهوده اثنين
واوصيك عن درب الخيانة لو عليك الوقت مال = والى عاهدت اوف العهد خلك على الميثاق أمين
ترى الامانه حمل جاير ماتحملها الجبال = لكن تحملها ابن حوى لانه من الجاهلين
واوصيك في وصل القرابه والمعزة بالوصال = ترى الولد من غير ربعه مثل مكتوف اليدين
وادمح خطاهم لو تجي بين الكلاوي والطحال = الصبر مفتاح الفرج حكمة قالوها الاولين
واحذر خويك لاتجيه الشمس وانته بالظلال = ترى الخوي والجار حقه بين خشم وبين عين
والضيف يشرح خاطره طيب النبا وسمح القبال = قدم له الثنتين واما الثالثه رأس السمين
واحذر يراودك الغرور وثم تنبذك الرجال = ويصير تقديرك ضعيف وتخسر احدى الحسنيين
واحسب حساب المخطية والصايبة في كل حال = ماينفعك هرج الشماته لااستقرت بالجبين
كان القمر من منزله عود على الساري هلال = مافيه داعي يحتريه اللي سرى حتى يبين
اللي بعرفه غر خمن مبهرة صفر الدلال = عنده خسارة مدت الفنجال بالكف اليمين
كلا بفعله والولد مابين جده والخوال = واللي قطع ساس ولده يسهج عليه ابالحصين
ايامنا فيها اختلاف وصار بالوضع انحلال = متخالط الاصلي مع التقليد صار الصنع صين
بعض الشباب ابعد عن الواقع وطاش مع الخيال = حطوا عوايد ربعهم في وسط ماء وحثال طين
تلقى بعضهم بالشوارع لاشماغ ولاعقال = ويقلدون احلام وأسماء بالشعر والفازلين
قلته وانا ماني وكيل آدم لكن حل المجال = شياً يحز بخاطري والله يعين الصابرين
آخر زمن صار الشهر يحسب مثل عشر الليال = ايامنا تركض وتمشي فوق مية واربعين
ياالله حسن الخاتمة قبل الفنا والارتحال = وياالله تعتقنا وتهدينا دليل الفالحين
تمت وصلى الله على شفيعنا يوم الهوال = محمد المبعوث لاهل الحق سيد المرسلين

ابراهيم عواد التلفيه
صباحك عسل
قصيده معبره ونصيحه وافيه
لله درك ودر كاتبها




حقيقه يخونني التعبير امام هذه الفاتنه
صح لسانك ولسان الشاعر
محمد بن سالم بن عواد التلفيه


وتقبل احترامي وتقديري

عبدالله

ابراهيم التليفية
بيض الله وجهك مشاركة اولى في كل شي ... اشكر لك حسن اختيارك .
بانتظار مشاركاتك القادمة بشوق لاحرمنا الله منك .

عبدالله الوحيشي
صباحك سكر
مرورك الكريم شرف للكاتب وللشاعر
وشهادة شاعر بمكانتك يدعو للفخر والاعتزاز

ابو فالح
أعتز كثيراً بشهادتك وتشجيعك دافع لنا لتقديم الأفضل وبالنيابة عن الشاعر
أؤكد أن القادم أجمل بإذن الله تعالى

إبراهيم بن عواد التلفية
أسال الله ان لايحرمك الأجر والله أنها قصيده مميزه
ومشاركة منك طيبة على لسان الشاعر
محمد بن سالم بن عواد البلوي
وأسال الله العلى العظيم أن يوفقك ويوفقه
وشكر خاص لك وله ونحن ننتظر جديد المميز
أخوكم الزاد

اخي

ابراهيم عواد


صح لسان الشاعر وسلمت يمناك وبارك الله فيك ونفع بالنصيحه


اخي ابراهيم هذي اول مشاركه لك في قمة الروعه


ننتظر جديدك اخي ابراهيم