قصيده كلها حكم (( كل بيت حكمه لحاله))

: قصيدة تستحق القراءه حتى البيت الاخير كل بيت حكمه

شاعر من العيار الثقيل
وعزالله انه شاعر
اسمعوا القصيد اللي عليه الكلام
من الروائع النادره
كل بيت حكمه لوحده



معوّض خير ياحيٍ تهقوى في الزمـان ومـال
سنينك لو رقيـت بعدلهـا يطرحـك مايلهـا

تعلّم وإعرف إن الدرب قدامك سهـل وجبـال
جبـال تطولهـا وجبـال بعيونـك تخايلـهـا

ومعوّض خير ياحيٍ وردت الماء بدون حبـال
يطول بك الوقوف وشربة المـاء ماتحصّلهـا

وقوفك عند راس البير مايسقيك لـو فنجـال
ولاينفعك شوف الجمـه اللـي منـت طايلهـا

ومعوّض خير ياحيٍ خدعك من الرجال أشكـال
تشوف أشكالها وتحطها أرفـع مـن منازلهـا

تعلّم من زمانك لاتصير مـن أجهـل الجهـال
ترى في كل يـوم تجيـك عبـره لاتجاهلهـا

إذا ربي وهب لك عقل تلقى في الرجال رجـال
تعرف اللـي يطلّـع قيمتـك واللـي ينزلهـا

ترى من بعض مايندي الجبين ويحرج الرجال
لياسـاق الميانـه فـي نفـوسٍ ماتقبّلـهـا

ومهما شفت في صاحبك من نخوه وطيبة فال
ترى بعض السجايـا كثـرة الإلحـاح يقتلهـا

معاريف الرجال ديون وديون الرجـال ثقـال
لياصرت متعافي ليش تغـرق فـي جمايلهـا

رصيدك في حياتك سمعتك مع طيبيـن الفـال
رجال الطيب والمعروف بالمعـروف عاملهـا

ولاتبدي بجاهـك فـي مقـامٍ مايسـر الحـال
ولاتشفـع لنـاسٍ ماتنومـسـك بفعايلـهـا

لياجاتك تعذّرهـا مـدام العـذر لـه مدخـال
ووقت الجد قول الهـا الصحيـح ولاتجاملهـا

وخذ منـي نصيحـه لاتصـدق كـل ماينقـال
يجـرك للنميمـه ليـن يطرحـك بحبايلـهـا

يجيلك ناقـل النمّـات بهـروجٍ تغـث البـال
سوالف في قفاك وحظك أطيب يـوم تجهلهـا

يبـرر بالحميـه والصداقـه شينـة الأفعـال
يجمّـل صورتـه بعلومـه اللـي ماتجمّلـهـا

ولو كانت حميه فيك رد المخطيه فـي الحـال
ولاكان إستمعها فـي قفـاك وجـاك شايلهـا

ترى من جاب لك ودّى وهذي عـادة النقـال
يحاول يقتنص من فمك كلمـه لأجـل ينقلهـا

ومثل ماقال عندك راح عنك وعند غيرك قـال
وزوّد عشر فوق الكلمه اللـي كنـت قايلهـا

تجنّب مجلسه لاتجلس إلا مع كريـم خصـال
تحمّـل ميلتـه وإن ميلـت ميلتـك ينقلها

ولاتصبر على الجار الردي لوهي ثلاث ليـال
تضـرك جيرتـه لوكـان بيبانـك تقفلـهـا

وبيع الدار بأول سومةٍ تعرض علـى الـدلال
ورزقـك عنـد ربٍ كاتـب اللقمـه وكافلهـا

وبنتك لاتزوجها الردي لوهـو كثيـر المـال
تربيهـا علـى الطـالات وتشـوّه سلايلهـا

وكم من لاش يرمي خيبة إبنه فوق راس الخال
لوإن الخال من روس الرجال ومـن دلايلهـا

ليامنك عرفـت تميّـز الطيّـب مـن البطـال
وفادتك التجارب في الحيـاة وفـي مسايلهـا

وكشفت الفرق مابين الصحيح وحيلة المحتـال
وتعلمت الفراسه في الوجيـه اللـي تقابلهـا

بعد هذي ترى مالك غنى عن صحبة العقّـال
يدلونـك بـرايٍ ينقـض الدعـوه ويفتلهـا

يقولون الرجال اللي سوالفهـم حِكـم وأمثـال
ليامن ضاعت الحيلـه يـدل القـوم عاقلهـا

نصيحة واحدٍ جرّب وشاف من الزمان اهـوال
يقدّم لـك خلاصـة هجـرةٍ جـرّب هوايلهـا



ـــــــــــــــــــــــــــــــــــ
راقت لي ونقلتها لكم

سلمت على النقل يابو حمد

كل الود

يعطيك العافيه على النقل يابو حمد

دمت بخير

وبنتك لاتزوجها الردي لوهـو كثيـر المـال
تربيهـا علـى الطـالات وتشـوّه سلايلهـا

وكم من لاش يرمي خيبة إبنه فوق راس الخال
لوإن الخال من روس الرجال ومـن دلايلهـا



سلمت يابوحمد
نقل رائع
قصيده تحمل كل النصايح والحكم
وصح لسان الشاعر
وصح نقلك وفكرك الرايق
اعجبتني وقريتها اكثر من مره
تشكراتي لك بعنف

سلمت على النقل يابو حمد

كل الود

سلم غاليك أبو خلف

يعطيك العافيه على النقل يابو حمد

دمت بخير

الله يعافيك
سررت بمرورك