جديده للشاعر سليمان الجبيل ومجاراه لها من محمدعوده

بسم الله الرحمن الرحيم






السلام عليكم ورحمة الله وبركاته












وصلتي من الشاعر سليمان الجيبل

هذه القصيده ولم تكن موجهه لي



ولكن لاعجابي بما تحتويه جاريتها


بما جادت به القريحه


آمل ان تحوز على اعجابكم




سليمان الجبيل

ضوار ذيب بداخلي واخيل مزنه مبرقه=مدري اخيل المبرقه ولاّ اتوحى للضوار
وش عاد ياشمس الحقايق دام منتي مشرقه=لا فادني مسراي ليل ولا مسيري بالنهار
القاضي اعلن جلسته مستفتحٍ بالمطرقه=لا نه يعرف ان العقول بروسنا لعبة قمار
ان ما حكم فك السراح يشد حبل المشنقه=والحق ما يرضي إثنين الا التراضي باختصار
البارحه لو ينسرق نصف الزمن غير اسرقه=عجزت اطيق البايهات اللي يدلن المسار
حتى الظلال اللي زبنته والرماضي محرقه=ظلال لكن تشعر انك بين نار وبين غار
ما يعمي عيون البنادم كبر نار المحرقه=مار البلا عود الثمام اللي بدار اهل الديار
الغربي إلى من غزا للعالم المستشرقه=يسلم ويسعى بالمزار وساس مسعاه الدمار

محمد عوده

قريت علم بشاشة الجوال والمصدر ثقه=رجال معرفته شرف وبيوت شعره عن قرار
ارسل لنا معناه واللي يفقه المعنى فقه=يعرف وش الاسم الحقيقي خلف الاسم المستعار
الوقت يكشف كل سر اخفاه عنا وادرقه=واللي على هيئة جمل اما جمل ولاّ حوار
والقاضي اللي يفهم الحق ويعرفه يفرقه=والقاضي اللي ما يعرف الحق جار وثم جار
واللي معه حق الهجاد تجيه حجه تغرقه=ونهاية الموضوع يصبح حق ضاع ودم فار
كذا مدام إن الزمن يلعب بنا لعب ورقه=الخير قدام الملا والشر من خلف الستار
ما فيه باب مقفّل إلا جاه طارق يطرقه=هذا يقول اصبر وذاك يقول طال الانتظار
والضامي اللي جاه من بعد الضما ما واشرقه=لو ما شرب يصير يمكن من طويلين العمار
اشباه الازوال اللي من اول ترقرق رقرقه=ادنى هوى لا هب يرميها ويجعلها دمار
والخاتمه ما أجاري الأستاذ من شان اسبقه=لكنّ أبو يوسف تهيضني معانيه الكبار

ولكم مني اطيب التمنيات

بيض الله وجيهكم على الجزاله

ياسلام ياسلام

هنا الابداع

والجزاله

هنا ( قرأة شعر غير عادي )


صوت من الشاعر الكبير / ابو يوسف الجبيل

وصدى من الشاعر الجزل والمبدع / محمد عوده


تحياتي وتقديري




عايد السميري

يعطيكم العافيه
امتعتونا بشعر جزل
بيض الله وجيهكم

لاجديــد يامحمد


شاعر جزل مبدع مدهش ممتع .. .. ..

الكامل الله يامحمد

تأكـَّد أن لك خانة بالقلب وخانة بالذاكرة ..


وصح لسان أبو يوسف وصح لسانك

والسلام والرحمة عليــك

اخوي نواف النجيدي




وانت وجهك ابيض




وشكراً لك على مرورك المشرف ومشاعرك النبيله




تحياتي وتقديري لك