قصيدة / مايستريح اللي عزم له رجاجيل

تكرر طلب كثير من الاخوه اعضاء المنتدى لقصيدة والدي رحمه الله والتي اشتهر منها البيت الاول لانه يصور حال كل رجل كريم تكون عنده مناسبه سواء كانت غدا اوعشاء او اي مناسبه اخرى عامه اوخاصه فلايرتاح بال هذا الرجل السخي حتى يوجب ضيوفه ويتجمل معهم .

وانتشر هذا البيت خاصة بين ابناء قبيلة بلي لانهم معروفون بالكرم والسخاء وهذا شي يشهد لهم به القاصي والداني ولست انا من يحكم عليهم بهذه الصفه الطيبه فشهادتي بهم مجروحه.

قصة الابيات التي اشتهر منها البيت الاول لانه يغني عن قصيده ان الوالد رحمه الله جاءه ضيف من الجماعه من اهل القريات واسمه دابس بن مجلي السرحاني في عام 1402هجري تقريبا وكان كعادته رحمه الله يستأنس به ضيوفه لحسن استقباله لهم وكذلك سرده للقصائد والسوالف القديمه وبنفس الوقت بين الحين والاخر يتفقد القهوه والعشاء وكانو يقولون له ( استريح يابو مشهور ) فنضم هذه الابيات وعندما قلط ضيوفه على العشا قال لهم الابيات وكلمة( مكيحيل) المذكوره بالقصيده هي منطقه مشهوره بكثرة الذئاب فيها واليكم الابيات

مايستريح اللي عزم له رجاجيل = اللي دعاهم للعشا واستجابوا
ماوفروا شاتي ذيابة مكيحيل= ولاعمرهم عن هبة الريح غابوا
يستاهلون الحيل ذباحة الحيل= كم حايل(ن)من عقر الضين جابوا
يالبيض ياللي تلبسن الخلاخيل= شومن عن اللي للمواجيب هابوا

الله يرحمك يابو مشهور..........شاعر الحكمه وشكرا لك يابو يوسف على الاستجابه السريعه وفقك الله

العفو يابوناصر
ومشكور على مرورك على القصيده

مشهور يوسف السرحاني

صح لسانك

الف شكر على تزويدنا بهذه القصه والقصيده لوالدكم رحمه الله

طالما سمعت هذه الابيات التي هي اشهر من نار على علم

دمت بكل خير

بيض الله وجهك ولا هنت والله يرحم الشاعر ابو مشهور يوسف السرحاني
يا مشهور ياليت تكتب اسم الوالد بالكامل لاني ابي انشرها بمنتدى التراث الشعبي
الله لا يهينك وتسلم

اخي الالبد
مشكور على تشريفك ومرورك على المشاركه