البيرق المنكسر للشاعر سداح العتيبي

من اروع ماقرأت وحبيت نقلها لكم

مافيه داعي تهلّ الدمع مـن شانـي

بكره يقولـون ليـه الحـبّ بكيّتـه

أنـا تمنيّـت تذكرنـي وتنسـانـي

وأنته يا ليتك تمنـىّ اللـي تمنيّتـه

رسايلك جات .. بين أسمي وعنواني

وتعلّقـت بيـن .. ضيّعتـه ودليّتـه

بعض البشر لو يدوّرني مـا يلقانـي

وبعض البشر لو يجاذب سيرتي جيته

لا تنشغل خلّنـي يـا سيـد خلانـي

استسمحك وقتي اللي معـك مضيّتـه

قل فارس الحلم .. خليّتـه وخلانـي

أو قول بالعكس .. خلانـي وخليّتـه

ياسيفي ودرعـي وخيلـي وميدانـي

البيـرق المنكسـر لرضـاك رزيّتـه

أموت من ضيقتي ميـر الله أحيانـي

وجوارحي نـوب لا حيّـه ولا ميتـه

رغم اني اعاني من الوقت ما اعانـي

مسحت صبري على جرحي وداويتـه

يا اللي تبيها سوى وصلي وهجراني

الأوّلـه زلّهـا .. والثانيـه ليـتـه

فرشت لك قلبي وشلتك في وجدانـي

وأرتحت في قلبي المفروش وأذيّتـه

في ذمتك لا تراودني علـى أجنانـي

وصلـت حـدّ الجنـان ولا تعديّتـه

وان قلت وشجاك مدري منك وشجاني

مغير مديّـت لـك كفـيّ وعضيّتـه

ماعاد مع راسي الا روس جنحانـي

والريح لاهـبّ مـع طاريـك هبيّتـه

اسمح لي اجرّ صوتي واسحب الحاني

والشعر .. لا ضقت غنّاني وغنيّتـه

العام انا .. مبتلش في عقدة السانـي

واليوم انا .. شاعرن ما ينهدم بيتـه

صح لسان الشاعر وسلم لنا الناقل