قصيدة للشاعر سعود كايد البلوي ورد الشاعر بشير عرابي البلوي في مزاد الخيل بالرياض

بسم الله الرحمن الرحيم

هذه القصيده للشاعر/سعود كايد البلوي عندما كان برفقتة الشاعر/بشير البلوي لحضور مزاد الخيل السنوي الواقع بالجنادريةلشراء جواد للشاعر/ سعود البلوي قال هذه القصيده

قال الذي بالخيل جاله مداخيل=لاعرضن له قام قلبه يميلي
على الولع ماينفع القول والقيل=متولعٍ والقلب يشعل شعيلي
جيت الرياض وناض برق المخاييل=خبرة بشير ونضرته هي دليلي
شاف الأمهار وحافهن حوف تفضيل=واختار من ميتين عشرٍ تهيلي
قال أطرق التركيز بالحيل بالحيل=ماغيرهن يصمل عليهن العميلي
وبساعة التعريض جوهن جحافيل=قوله صحيح وشفت منه الحصيلي
كلن يزاود بالثمن والمكاييل=ياليت يرجح بالموازين كيلي
قلبي خفق للخيل في تالي الليل=وسط المزاد وسعرهن هد حيلي
بمدرجٍ يرقص لعزف المواويل=في صالةٍ ماتسمع إلا الصهيلي
من شامخاتٍ ماخذاتٍ تشاكيل=ومفصلاتٍ بالمقاس الجميلي
متعة نظر عيني وعض الأناميل=لاجال واحدهن وجاله بديلي
ولاهالني يا كود شقراً تهاويل=باللون شعلة نار عرف وشليلي
صبحى جليلةٍ والثلاث محاجيل=طلق اليمين الوصف ماله مثيلي
مضرب مثل فيها تطيب التماثيل=لاشك أبو سلطان رجلٍ ثقيلي
قال أركد أركد لاتعجل تعاجيل=عذروبها إن العنق ماهو طويلي
لولاها كان مكمله بالتكاميل=ولاكاملٍ إلا وجه رب الجليلي
قلته وأنا برفقة رجالٍ نوابيل=خالي وأبو سلطان وإبنه خليلي
ياإبن عرابي خذ لقب شاعر الخيل=تستاهله مني وهذا قليلي
إنت الأديب محصل الطيب تحصيل=تضرب مواجيبه بسيفٍ صقيلي

بسم الله الرحمن الرحيم

هذه القصيده للشاعر/بشير البلوي رداً على الشاعر /سعود كايد البلوي

بديت بسم مسهل الرزق تسهيل=عبده بلا مده قليل الحصيلي
يعطي ليا شحن يدين مباخيل=وهوالذي بالمد ماهو بخيلي
مرجع على يعقوب يوسف عقب طيل=شم القميص وقال هذا خليلي
عواد للقاع المحل بالهماليل=من مدلهمن بس يهمل هميلي
البرق يبرق والرعد له زلازيل=وأللي بدربه من شعيبٍ يسيلي
تربعبه الخلفات وأم المخاليل=فياضه غدت عقب المحل تقل نيلي
مرتاع بدوٍ يبعدون المراحيل=هذا رحيل وذاك توه نزيلي
من بعد ذكر الله قلت التماثيل=أترك هزيله وأبتدي بالجزيلي
قال الأديب وهيضن صاخر القيل=وأحضرت من نبع التماثيل قيلي
عندي دليل من خيار الدواليل=وكثر التجارب علمتني بجيلي
ردٍ على أللي لقبً شاعر الخيل= والخيل مايقنيهن إلا النبيلي
بالخيل مانطاوع كلام المهابيل=هواية شرف وأللي نقدنا هبيلي
سعود إبن كايد من رجال حلاحيل=إخزام العنيد أللي ضميره عليلي
إنته وأنا نمشي بدرب المشاكيل=إجدادنا أللي يحتمون الدخيلي
على الأصايل ينطحون المقابيل=ياطار ستر منقضاة الجديلي
جينا المزاد اللي تبيعبه الخيل=وأشتقت انا مع كل قباً وأصيلي
قباً بهن من شرد الصيد تمثيل=غزلان بر جافلاتٍ جفيلي
بأوصافهن تحتار كل الرجاجيل=توصيف ولد العود فيهن دليلي
عودٍ جراله من زمانه غرابيل=له خبرةٍ بالخيل ماهو جهيلي
تم الكلام أللي نظمته بحرف إيل=مبداه بإيل ومنتهى القاف بيلي
وختامها مني صلاة وتهليل=على محمد عد وبل المخيلي

صح لسان الشاعرين

ابو عبدالعزيز وابو سطام


ويعطيك العافية اخي الكريم

شكرا أخوي خلف فالح العصباني على مروورك وصح بدنك

صح لسان الشاعرين

ابو عبدالعزيز وابو سطام

ويعطيك العافية اخي الكريم