ومن الحب ما قتل

بسم الله الرحمن الرحيم

هذه القصه سمعتها من الراوي ناصر المسيميري .....وحبيت ارويها بطريقتي

كان البدو يجمعهم الصيف ويفرقهم الربيع / بالصيف يجمعهم الماء وأغلب ما يكونو

على بير المهم كان البدو وقت الصيف وفيه شاب وسيم وشجيع وفارس كانت مهنه

ينزل بالبير حتى يغطس الدلو بالماء للناس... فيه ناس يسمونه غطاس او مقاس او

مياح وفيه بنت معجبه بالولد المياح وتبيه يكون من نصيبها ......المهم الولد كان بالبير

الا والدلو الي نزل عليه مربوط بطريقه مختلفه الحبل مثني ثني على العراقي الي بالدلو

وهو يطالع فوق براس البير الا وهو يشوف البنت براس البير يادوب يشوفها وهي

تطلع طرف جديلتها او شوي من شعرها وهي تروح .... اليوم الثاني ونفس الدلو ينزل

عليه ونفس الحبل مثني على العراقي ....... وبعدها اختفت البنت وجاء الربيع وتفرقو

البدو كل منهم راح بالتجاه ...... والولد بلش ما يدري كيف يعرف ها البنت ومنهي

بنته حتى يخطبها ......فيه مثل يقولون البدو أول (( اذا بلشت انشد من الناس

شايب )) والولد هذا يروح لعجوز وهو يعلمها وش صار معه بالبير وقال مدري كيف

اعرف هالبنت ؟..... قالت العجوز البنت علمتك بكل شي وقالت من ابوها وعلمتك

بديرتها وعلمتك ان ابوها شيخ .... قال الولد كيف علمتني ؟ قالت اعجوز يوم ثنت لك

الحبل قالت اسم ابوها ثاني ويوم ثنته على العراقي تقول ديرتها ديرة ابا العراقي ويوم

بينت طرف شعرها تقول ابوها شيخ يسكن بطرف العرب ...... الولد اخذ العلم وراح

لديرة ابا العراقي وفعلاً سأل الرعيان من شيخكم قالو الشيخ ثاني وهذاك بيته الي

بالطرف وفعلاً طلع كلام العجوز بمحله المهم الولد صار ظيف عند جار ثاني اقرب بيت

للشيخ ثاني وظيفه راعي البيت عنده وكان الولد ياقف برا البيت ويشوف الرايح والجاي

شكت فيه مرت الرجال وقالت لرجلها ظيفك هذا وشو اشوف حركاته ماهي طبيعيه لا

يكون ذابح له احد ولا سارق وانت تستر عليه قال بكره يكمل ثالث يوم واسأله

(( طبعا من عادة البدو أول ما يسألون الظيف منين جاي أو وش حاجتك الا بعد ثالث

يوم )) المهم بالليل الولد طلع من البيت وانتبهت له مرت الرجال وقالت لرجلها شف

ظيفك سرا اتبعه شف وين يروح ؟ فعلاً صار يراقب الولد من بعيد لبعيد والولد قرب

لبيت ثاني وصار يحذف من الحجر على شق الحريم الا والبنت تطلع وقالت انت من قال

انا المياح الي بالبير يوم نزلتي علي الدلو وثنيتي الحبل على العراقي .... قالت طيب

وش جايبك بالليل قال ودي اعرف انتي تبيني زي ما انا ابيك انا احبك وما انام

الليل قالت تنام ولا ما تنام عيب الي يجي باطريقه هذي الي يجي يجي بالنهار ويروح يم

ابوي ويخطبني منه ...قالت انت عند من ؟ قال عند جاركم فلان قالت يالله ارجع ولا أحد

يشوفك ولو كلمت جارنا يخطبني لك ترا ابوي ما يرفض له طلب ولكن ارجع وبكرة

يصير خير ....الولد فعلاً رجع لبيت جار ثاني لكن رجع مصتصيب ما توقع ان البنت

تقول له كذا.. المهم راع البيت الصبح يبي يصحي الولد حتى يصلي ويفطر قال يا ولد قم

قم يالله الصلاة الا والولد مايرد وهو يقلبه الا وهو ميت وهو ينفجع وهو يعلم مرته قال

ظيفنا مات وهو يرسل ولده يم بيت ثاني يجيب من عندهم مسحاه يحفر بها القبر والولد

الصغير يروح لبيت ثاني قال عطوني مسحاه قالو وش تبغى بها قال ابوي يبيها اظيف

الي عندنا ماااااات الا والبت تسمعه وهي تصرخ وهي تموووووت ودفنوهم بوقت واحد

انا لله وانا اليه راجعون (( وفعلاً ومن الحب ما قتل )) سبحان الله فعلاً قصص لا

تكاد ان تصدق !

أتمنى ان تعجـــــــــــــــــــــــــــــــــــــبكم