لاعاش منهو يبكيك

اول مره افتح اضافه واحس اني مضيع وش بكتب
او وش اللي يحدني اضيف موضوع
امكن هنا تكون بداية احزان ونهاية افراح
او العكس الله اعلم

ياكثر ماعطتنا الدنيا على قفانا وياكثر ماخاننا الاحساس
ومانقوى غير نقول صبر جميل والله المستعان

يوم حلو نعيشه لازم نثق ان بكره العكس
وتمشينا الدنيا بمزاجها نصير بيدها مثل الدمى
متى ماتبينا نضحك وزعة علينا الابتسامات والقهقهات
ومتى ماجاز لها تبكينا تسلب منا الضحكه وتروج لنا الدموع

اول غصة ذقتها بحياتي ومانسى شلون صعب عليه ابلع ريقي فيها

لماكنت صغير في ثالث ابتدائي
بالصباح دخلت الفصل لقيت صديقي خالد
قليل فيه كلمة صديق احبه بجنون
امكن لو كانت فيه الحين احسه بيكفيني عن كل العالم

جيته وقت الفطور كل العيال نزلو الساحه بقيت انا بجنبه
خالد مهيب عادته الخمول ملاحظته من الصبح اذكر وجه مصفر
وعيونه غريبه جيته قلت خالد وش فيك يالله بننزل
كان يالله يرد علي يقول انا تعبان ما اشوف شي قدامي
قعدت شوي وكلمته ماجاوبتني قلت خالد طيب
اكلم الاستاذ يعطيك دوا يمكن تصير ازين
مارد علي يدي بيده والعيال شكلها يتغير
بالاول يالله يرد علي ببطء وشوي شوي معاد اسمع له نفس
اللي اذكره كان ضاغط على ايدي بقوه
وفجئه تلاش قدامي حسيت انه جماد هزيته ناديت عليه علي بالي نايم
جلست جنبه اناظر فيه ماكنت افهم وش معنى يومه انتهى
كل ذيك اللحظات وانا ابلع ريقي احسه مثل الشوك يالله ابلعه
جسمي انا بعد بدى يبرد... قوة يده معاد احس فيها
شوي والا يتجمعون العيال والمدرسين واسمع صياح العيال
وانا اناظر فيه وهم يشيلونه
وانا للحين ما استوعبت انه راح
رحت البيت وانا ساكت ومعي شنطته واغراضه
من اليوم الثاني من بدري جننت اهلي الحين بروح المدرسه
دخلت انتظرته بكرسيه طولت وانا انتظر
رحت للمدير ضام شنطته على صدري قلت ياستاذ ممكن اكلم خالد
بقوله شنطته معي جاني المدير
قال خالد خلاص ماراح يجي عطني اغراضه
انا اوصلها جلست ابكي لكن بداخلي
لاني موب مستوعب حجم كلامه
عطيته الاغراض وجلست يومين انتظره ماله طاري
تذكرت ولد جيرانهم هنا رحت اركض قلت خالد وين؟؟
رد علي مادريت خالد مات وحتى مات وهو بجنبك يقول الاستاذ لابوه
حاولت استرجع ذيك اللحظه مااستوعبتها الا لما كبرت فهمت معنى الموت
والفراق الله يرحمه صغيري

اللي ذكرني بسالفة صديقي احساسي اليوم بغصه اوجعتني
فجيت واضفت موضوع يمكن بكره لاصحيت اسئل نفسي ليش انا كتبت ذا الكلام هنا؟؟

بس على قولة ابوي ماندري منهو صاحب بكره



صفحه لكم تعبرون فيها عن اول غصه

أشوفكم على خيررررررررر