ياللــي لكم مركاز عنوانه الـجود

أتصلت بالأخ عيد ابن فالح السحيمي وهو في ام رقيـــــــــــبه وعند سؤالي عن احواله
قال لي : الخيمه مبنيه والجو ممطر والنار مشبوبه والذبيحه معلقه وعندي الشيخ خلف
الفالح والصديق سلامه العصباني

وارسلت له هذه الابيات :

سـلام لـك ياعيد مثـني ومـردود = ياصلك لونك شمال اليـمامـه
بالله سلم لي على راعي الذود = وبلغ سلامي يالسحيمي سلامه
ياللــي لكم مركاز عنوانه الـجود = مبني وفعل ايدينكم له علامه
ماردكـم عن شـبة الـنار مرعـود = مزنـ(ن) تنثر ماه واسقى العدامه
يفوح طاريكم كما غالي العود = اللي يقدم للنشاما كرامه
يا جعلكم للخير من زود في زود = ومن ام رقيبه ترجعو بالسلامه

/
\

وقد تم الرد من عيد بهذه الأبيات :

يا مرحبا ترحيبتـ(ن) ما لها حدود = عرض الوطن من حد صنعا إل شامه
ترحيبتـ(ن) مثل المطر ينزل ردود = والذ واحلى من حليب الجهامه
ريح البختري والنفل تدفعه نود = للصاحب اللي سر بالي كلامه
الصاحب اللي بالمواقيف موجود = يملك من المعروف ذروة سنامه
شوق الذي قرنه على المتن مرجود = بنت الشيوخ اهل الكرم والشهامه
شاعر قبيله بالمحافل له شهود = والشعر يلقى فوق صدره وسامه
فالح عسى دربه له سهود ومهود = ومثله ترى يفرص علي احترامه

.



.

ياسلام يابو عمر مبدع وجزل كعادتكــ

صح لسانكـ ويستاهل عيد فالح السحيمي وصح لسانه على الرد

تحياتي وتقديري

صح لسانك يابو عمر وصح لسان الشاعر عيد السحيمي على الرد الجزل

والحقيقه صياغتك للابيات لها ذوق خاص وانا استمتع بقصائدك واتحرى جديدك

سلامي لشخصك الغالي ولمن تقابل من اخوانا في المنتدى وفقكم الله

صح لسانك يابو عمر وصح لسان ابو بندر

كل الود والتقدير للجميع

صح لسانك يابو عمر

وصح لسان الشاعر عيد السحيمي

مضمون الرساله جميل
ومضمون جوابها لايقل جمالاً عنها
وهذا يدل على المخزون الشعري لدى الشاعرين
سلمت يابو عمر وسلم الشاعر عيدالسحيمي
لكم مودتي