هذه القصيده للشاعر سالم بن صالح القرعوطي

مهداه الى الشاعر سعد بن هويمل ابن زرم

يقول من عدى بروؤس المراقيب
وأحفى رجوله فوق راس الطويله
راحت هواجيسه لفكره مناديب
تطرق له البيبان في كل ليله
سلام مني يا هلا العز والطيب
يا أهل الكرم وأهل البيوت الظليله
ا أهل المواقف يوم حام اللواهيب
يشهد لها الميدان بالمستحيله
نعم! بهلا الحيزا وهم المواهيب
قبيلة يا حيها من قبيله
تاريخها سطٌر لا شكٍ ولآ ريب
يوم القوامه بالسيوف الصقيله
بدروبهم يا ما شبع هامل الذيب
يوم المدافع في خشوم الفتيله
ماضي يشابه ماضي الزير وكليب
وعنتر وابو زيد الهلالي وجيله
من دون نقصٍ في النشاما ولا عيب
كلٌ مع الأيام حصٌل حصيله
والعز يفخر في حصان الأطاليب
اللي مع الطرقات ما طاح حيله
يا بن زرم قلبي تشده لواليب
والكبد من مر الليالي عليله
وانا علياتطلع الشمس وتغيب
والهم في قلبي مخيم نزيله
وأخذت من دنياي عدة تجاريب
وقست الزمان وشفت عدله وميله
وقت الرخى نلقى يا كثر الاصاحيب
ووقت اللوازم تصنع الفين حيله
جار الزمان وبين براسي الشيب
والوقت لانه جار من يرتكي له
الا الرجال اللي تحل المناشيب
ومتونها تقوى لشيل الثقيله
وختامها مني بزين المكاتيب
ألى اهل المعروف واهل الجميله