ظاهرة الترميش

الشاعر : هليل حامد البلوي

المشترى بالكاش والبيع ترميش ::::: اما عمار البيت ولا خرابه
هذاالمثل خلا العرب في تلبيش ::::: بين الحقيقة والوهم والغرابه
الجيب لكزز راكبينه هلابيش ::::: واللي على الوتساب يعرض حسابه
واللي على درب المرمش مطانيش ::::: يمكن يسجلهم بكشف العصابه
واللي محصل من وراهم عراميش ::::: ان شاف راعي سلعةً دق بابه
توقيعهم بالكمبياله خرابيش ::::: ما تثبت المطلوب وقت الطلابه
لا تضيعون حقوقكم يالدراويش ::::: بعض الطمع ما يجلب الا الكئابه
من يوم حطو في يديهم كلابيش ::::: كلاً يواسي صاحبه في مصابه
المشكله بكره ليا قال ما فيش ::::: اكثر عباد الله يفقد صوابه
والادمي من دون تفكير ما يعيش ::::: وان لم تكن ذئباً كلتك الذيابه

............…………......................
رد فيصل بن رفاده

يا هليل الموضوع ماهو بتحريش ::::: فيها غسيل اموال فيها نهابه
من رمش الموتر يدور معاويش ::::: ما هاب دربٍ واجدٍ من يهابه
يبغى الغناء باسرع طريقه ولو ايش ::::: وان راح ماله ما يهمه ذهابه
وانته من اللي راح ماله كما الريش ::::: في سوق الاسهم والتجاره تشابه
هذا مرمش وانت شاري سهم بيش ::::: امغامره والرزق ماهو حرابه
في سوق الاسهم ضاع حمر الطرابيش ::::: ولا اعتبرت بطيحته ما انت آبه
لا تلوم من رمش يبي لقمة العيش ::::: ماهو طمع بالمال حظه غدابه
العافيه بالعمر تسوى التراميش ::::: الحمد لله عمرنا في شبابه