ديــوان / مـارد الشـعـر ...( الحميدي الثقـفي ) .

( زهرة المنتهى ) !


بعض القصايد غذا

.............. وبعض القصايد سم

وبعض القصايد كذا

..................... صرخه بليا فم

جرح ينزف شذا

..................وجرح ينزف دم

ومابين هذا وذا ..

............. شوف المسافه كم ؟؟؟؟

.

لا تحتار بأمرك..

ياتمشي زي الكلب الماشي..

في ظل العربه..

( تـتأمرك) !!

ياامّا الباقي في عمرك !

.

.

أنت خرجت من سواحل صوتي المتعب صدى

__________ طفلة قصيدة أو قصيدة طفل مجهولة حنين

ماتشبهين الحلم ما دام الـ "صباحاتك مدى "

__________ تعبت أصبك في مكــان الجرح نار وتنطفيـن

جيتك خيـــــالي دخل خــارج مجــارات الردى

__________ جيتك وبعيونــي قرى ترفض جباهٍ تستكين

ابي صباحاتك أمس تستاهـــل دموعي ندى

__________ ابي نهار مصافحك يستاهل اعصـابي تلين

ابي تزيــــديني ظلال الشاعر إن ضل اهتدى

__________ أبي على طول انتظر وأنتي تجين و ماتجين

للدرب عمري ما اقتديت الدرب لخطاي اقتدى

__________ دربٍ قتل كل الخطى،عندي يموت بخطوتين

في سلة أحلامي"خبر" يرفض حصار"المبتدى"

__________ أنـــــا الفقير اللي نطق بفواه كل المعدمين

أحـلامنا توجد صغــــار وتكبر ذنـوب وعدا

__________ بيـــن احتمالات الحياة ورهبة المـوت اليقين

.

سندباديات البوح

تعبت اراجيهم بما تخفـي الـروح

_________ متشردٍ قطاع غـور الـدم الحـار

إما مسافر حامل أفكاري جـروح

________ ولا مقيم وحامل جروحـي أفكـار

وتعارضت في سندباديـة البـوح

___________ كينونـة الناسـك وبوذيـة النـار

السر مسودة تفاصيـل مفضـوح

________ والحال تضحك منّه أشباح الأقـدار

أحكي وكيف أحكي بما تخفي الروح

__________ وانا يدي حمرا بلون الـدم الحـار

جمرة آلما


لو صرخت. النار لاتحطب ضلوعك

________ زادها وزنادها مني وفيِّه

وان صرخت. النور لاتوقد شموعك

________ في عيوني من غبار الشمس فيَّه

وان صرخت الموت لاتنزف دموعك

________مانزف طاهر كما دم الضحيه

ليه تبني فوق رعش احلام جوعك

________عرش عراف المسافات القصيه

وإنت دايم سلمك يرقى طلوعك

________ماستوى طينك لتوطينك هويه

كل منفي داخلك ملفي ربوعك

________ وانقطاعاتك لطاعاتك عصيه

اعص ولاّطيع عصيانك بطوعك

________ لاتطفي جمرة آلما في يديه

هاك نار القلب لاتحطب ضلوعك

________ تحطب ضلوعك ونار القلب حيه

"الخامسة والثلاثين "



الايادمي .. يادم الرازقيه

مية عام ماعتقتّك المغارس

الا يادمي طلقة البندقيه

حشا .. مايبورد بها كل فارس

هي الشمس .. لو غربت مشرقيه

هو البحر .. موطن ومنفى النوارس

بقا بي من الكل .. كل البقيه

شغب ضجة اولاد صرفة مدارس

الا يادمي .. يادم الرازقيه

مية عام مسجون من غير حارس!!+

...............

تكللت وحدي / توحدت كل

تظللت جسمي / تجسمت ظل

تحللت أسأل / تساءلت حل

تقللت كثري / تكاثرت قل
..................

اقبلي واقبلي .. واقبلي واقبلي

في بياض الغموض

وفي الغموض المبين

صرت انا كل ما مافات فيما يلي

ماتبينه يكون / كوني اللي تبين

اقبلي واقبلي .. واقبلي واقبلي

مظلمه مشرقه / خافيه بينه

اقبلي هالة المعتم المنجلي

مثل من ظل يمشي على بينه

احلم بحضورك .. أمضي لمستقبلي

دام راح التعب / راحة المتعبين

طوقيني..

بحس بيقيني ..

هي ( الخامسه والثلاثين )

بوابة الأربعين

اغسليني بما رآب من زرقة الرمل

وكتابك المحو ..

والمحو ماتكتبين..!!

واطلقيني ..

مع الليل للشمس ..

ياشمس صبح اشرقيني..

فلربما تشرق الشمس مني واغني :

( الا ياهلي ) ..!!

صدقيني هي ( الخامسه والثلاثين ) ..

بوابة ( الأربعين ) ..!

اغسليني ببرد الغبش ..

من دروب .. الشغب

توقف الناس عند اول اعتابها متعبين

احرقيني بسكينة الشك ..

ابقطع يقيني..!!

هي ( الخامسه والثلاثين ) ..

عند اول اعتابها

تفتح اسطورة الصخرة ابوابها..!!

تسألي ..

انت مين ...؟!

افتحي الباب ..

واحد من المنتمين!

المعصَّر بغيم الصدف

بالغوايات ..

بالطيش ..!!

وبلذة العيش

في ( الآخر ) اللي نزل فيه ..

واستوطن الذات

ثم ارتحل من دم النطع ..

حتى اقاصي سديم الملذات ..

والولدنه..!

اقبلي وغدنه

مظلمه/ مشرقه ..

مجدبه / مورقه ..

ممحله / مغرقه ..

بارده / محرقه ..

كوني ابعد من الأقربين

أقرب الأبعدين ..

اقبلي ..

كوني الاصغر الأكبر الـ .. الـ .. بلا الـ ..!!

كوني مثل ماتبين ..

جاهله / غارقه ..

حانيه / جارفه ..

هاديه / عاصفه ..

قاسيه / لينه

صعبة ٍ / هينه..

كافره / دينه

غامضه / بينه ..

مثل مستقبلي ..

اقبلي :

كل ماخط منحط خطين..

خط البدايه وخط النهايه

...........

ركضنا .. وقفنا ..

سمعنا وطعنا ..!!

اكلنا شبعنا .. !!

على ربوة في العقيق اجتمعنا ..

نغني (( احنا وسود العيوني ))

وياعيوني / عيوني!!

وياشجوني / شجوني!!

وياظنوني / ظنوني!!

وياديوني/ ديوني!!

وياسجوني / سجوني!!

وياعطوني / عطوني!!

لحد ماسكتوني ..!!

تعبنا نغني :

مشينا لعليا في ثمانين ليلة ٍ ..

على شانها عليا تهون الصعايب

عشرين منها تضرب الارض بالحذا ..

وعشرين منها في ظهور الركايب

وعشرين منها في البحور الغزيره ..

وعشرين منها في الجبال النشايب

وعشرين منها في بطون الشعايب

............

طاعن ٍ ف( الباهت ) المصفر وجهك ..

شاحب ٍ ذابل ومنهك ..

في ظهيرة يوم سبت ..!!

والمدينه تطفح ارصفة الشوارع

ضجة اولاد وشغب ..

صرفة مدارس

تحت شمس ٍ من نحاس ..!

كنت بلحالك ..

جسدك ..

وماتيسر من ظلالك

كنت تنسج من سؤالك حيرتك..

والريح تنسج منك خبت ..!

كل كلمة صيف تكتب محوها ..

تمحي كتابتها

تتكسر مرايا من خيال الما..

على مرمى عطش مكسور كاس ..!

هو من فينا البحر ..؟!

قال الجسد للظل ..

قال الظل : من فينا الغريق

امتد وامتد السؤال وما أجبت ..

هو من فينا كسر قيد الطريق..؟!

ومن هو المأسور من فينا الطليق..؟!

وطال .. طال الظل طال ..!!

اكتظ حولك من غبار التايهين وجوه ناس

هو من فينا .. ومن فينا ..

ومن فينا تمادى .؟!

طال طال الظل طال ..

لحد ماصاح الجسد :

يكفي ..

تعبت.. !!

ارجوك من هذا العبث..

يكفي .. تعبت .!!

بعدها صار البحر صمتك فراغك

والشجر هذا الدم المورق شماغك ..!

والهوى كينونتك ..

والأرض تحت اقدامك ..

والما ينحسر عنها ..

ويمتد اليباس

..........

البحر باب الملوحه ..

والشجر عالم بروحه

مثلنا مثل الطيور ..

كلنا تكوين ( لوحه )

شمس تكتب مامحيت ..

وريح تمحي ماكتبت

ربما كراسة زرقا / سما ..

تجلس على صخرة نهار

تختمر كراس ازرق في التباس المبهم .. المبهم..

لحد الالتباس

وهم ..

.. وأوهام ..

امد خلف النافذة يدي ..

أقبضها … أردها

ألقى بها حفنة ظلام ..

أروح للصنبور ..

أغسلها أنام ..!!

*********

( موت )

أمدد أقدامي

جدار قدامي

وجدار من خلفي

أموت .. رغم أنفي

*********

( غبن )

صار اصبعي ريشة

صار القلم فرد

ومشرد حروفي ... ترعى مضارب جرد

بعض القصايد سم

والبعض الآخر كذا

صرخة بليا فم

ومابين هذا وذا

شوف المسافة كم ..؟

*********

ياسيدي الجمهور ..

لولا عذوبة مانقول .

كان الحقول

صارت اراضي بور ..

عزيزي الجمهور

ان مافهم الي نقول .

تقدر تطفي النور ..!!

*********

أمدد أقدامي

وجدار قدامي

وجدار من خلفي

أموت رغم أنفي !

* * *

تقول أمي وهبني شعري الخلاق عز وجل جمعت لها النجوم بثوبها وأبتلت أسماله!
* * *

ياطفلة الريح افتحي شرفة الغيم على العطاشا ينفض البرق ظله !
* * *

انت ملحد

انت فاسق

انت زنديق

وحداثي

انت تهذي

انت تجهل

ماتقول

وقاطعه :

أنت عشق الليلك

اليابس على

عتاب المدى ..

انت صدى

صوت الجميع

وماتعرف من الفصول

الا الربيع !!

* * *

قال الشعر قلة حيا قلت : الشعرقل لتحيا !
* * *

لغيابك المثمر تصب العناقيد لذة حريق الثلج في سلة النار
* * *

من رقى نخلة الدفتر وشق السحابه تغسله بـ احتمالات المطر والتراب!
* * *

انام وادخل قميص الليل مع كمه واخرج صلاة الفجر مع كمه الثاني!

حبر الكتابة

صاح بي .. صاحبي .. والليل حبر الكتابه

________ كيف نرسم وطن للمتعبين أغتراب

كيف تطــلع يدينك ... يارفيق الصـبابه؟؟

________ وانت للتمر في شفتك طعم الغياب !!

قلت له ظلك الناضح ... بريق ومـهابه

________اطعن الظل واكتب من دماء الجواب

من رقا نخلة الدفتر ... وشق السحابه

________تغسله باحتمالات المطر والتراب

كل ما خدرت ... صحو السؤال // الإجابه

________سال قيظٍ تشــجر من ضلوع السحاب

فوق نخلٍ جنوا طلعه ... وخانوا ترابه

________وارتدوا فوق ثوب الطين / طين الثياب

صبّي الغـــيم ياسلمى ... لناسً غلابه

________من عطشهم على الما يحلبون السراب

اظهري مثل نفحة برق ... والفجر غابه

________واختفي مثل ورده في ظنون الكتاب

غصنها يعزل الما .. من سراب التشابه

________والنسانـيس ترسم به نوافذ وباب

.

الــصـــايـــع
.



ضاق صدره ..

حس حتى البيت اللي .. انو لد به ..

صار قبره .!!

لملم انفاسه .. وبعض اوراق كراسه

شرب باقي بقايا الشاهي البارد بكاسه ..!!

وخرج ..

وقف على الدرج ..

ولع سيجاره ..!!

استرق نظره على شباك غرفة جارته ..!!

شاف جاره .. وانحرج ..!!

أرخى راسه .. صار نصف انسان ..

ربع انسان ..

ماباقي من الإنسان فيه الا لباسه ..!

كان في حالة ندم ..

لو طعنته وقتها ماسال منه .. نقطه دم ..!!

.....

والله ياديما ..

مااسامح اسلافي ..!!

أخذوا الأيادي ..ما ..

خلوا سوى اكتافي ..!!

أمشي كما الأعمى ..

قدامي خلافي ..!!

والنور والظلما ..

حملٍ على اكتافي ..!

( واغض طرفي إن بدت لي جارتي ..

حتى يواري جارتي ماواها )

...

على خيال الما ..

هذا الحجر طافي ..

كل النسا : سلمى

وكل الرجال : وافي

لاصارت الأسمى ..

تلمس وتنشافي ..!!

..

وامتطى سيارته ..

سار في كل اتجاهات المدينة ..

لف ابو كل الشوارع

مره نازل .. مره طالع

مرن نازل ... مره طالع ..!!

قل : يدور شلته

قل : يفكر في عذر ( للجار ) إذا علم ابوه بزلته

قل : يبي ( كفتيريا ) جايع ..

يبي يشرب وياكل

قل : يدور عن حلول

او عن مشاكل ..!!

قل : يسوي مايسويه المراهق ..

إنحرافات وخرافات ..

وسخافات .. ومهازل ..

قل : يغازل ..!!

....

البحر ..

ويش البحر..؟!

لولا رمال الشط ، والأطفال ، واليامال..

والمرجان والأصداف والما.. والسفينه

والمسا ..

ويش المسا..؟!!

لولا دفا لون الستاير من شبابيك المنازل ، والنسا ..

وخشوع جمر الليل في احظان المباخر ..!

انت شايف ضحكة الموجه على صدر البحر تختال ؟!

شايف ضحكة الما .. كم حزينه في نوافير المدينه ؟!

شايف الفرق الكبير الشاسع الواسع

شايف كم هي الأشيا تكون أجمل كثير بدون آخر ...!!

............

في اليمين من التقاطع

اعترض له نور احمر

نور ساطع

صاح به : اوقف

وكان الصوت حازم حزم قاطع

خفف السرعه .!!

رخى صوت المسجل

ارتجف .!!

صاح نفس الصوت وبقوة صراخ : أوقف

وقف ..

واستعاذ بطيبته من شر حراص النوايا

وين رايح ..؟؟

أو إذا ماكنت رايح قلنا من وين راجع

ماأنا .. ما ...

ما أنت ماعندك ادب

إنت تربية شوارع

إنت شكلك واحد مسوي سوايا

هات إثبات الهوية

حاضر وماعندي مانع

ها هـ هذي هية :

الإسم : راضي سويكت

المؤهل : جامعي

المهنة : صايع

.



موجـــة حمام

.

رفرفت في بالي اوراق بيضا مهملـة

__________ واشتهى صمت ابيض الجوع تفاح الكلام

مثل طفل ٍ كان يبنـي ويهـدم منزلـه

__________ في هديل البحر واصطادته موجة حمام

جيت لاسهم ٍ تناسـى ولاجـرح ٍ دلـه

__________ عن هوى اللي ينزعون الجروح من السهام

جيت للدنيا قمر وجه صوتـي حنظلـه

__________ تحت جلدي ذاكرة خبت من رمل .. وعظام

لي سما عالي وحفنة سديم و.. وسنبله

__________ سبحت فيها وغنت عصافيـر الغمـام

كن من روّع ضبى خبت دمي واجفلـه

__________ وارتبك في حانة الصيف طاروق الصرام

كلمـا قربـت للريـح نـار ٍ مشعلـه

__________ فوق صدري زادني جمرها برد وسلام

كيف خيلت آخر الوقت قـاع ٍ ممحلـه

__________ كيف خيلت آخر القـاع وقـت ٍ للهدام

وش هو آخر دربنا .. آخر الدرب اوله

__________ لاهمزنا مهرة الوقت وانـزاح اللثـام

كل درب ٍ تعرفه حـاول انـك تجهلـه

__________ الدروب لصمت وجهي .. مجاهيل وظلام

قميص الليل


دخيل ركض الوجـع والآه والضمـه

_________ ومتابع الركض .. لاتكّلف على شاني

خلاص مني ومنك الحب في الذمـه

_________ تضاعفت من جروحك قـوة ايمانـي

محسوبك ان جيت وان ماجيت ماهمه

_________ وش ياخذ الدمع من تغميضة اجفاني

انام وادخل قميص الليل مـع كمـه

_________ واخرج صلاة الفجر مع كمه الثانـي

اتنفس الفجـر الاول عاقـد الهمـه

_________ واركض مع الناس .. والعن خيّر احزاني

كرامة النفس عندي فوق في القمـه

_________ وتثور من دونها .. ناري ، ودخانـي

ذبحت خيل الهوى .. واسقيتها دمـه

_________ خليتها غصب تحمل جثة ( الجانـي )

ياحالمه في دروب العشـق مهتمـه

_________ عمري مهو لك رصيف احلام واشجاني

عمري قصيده ( ردية حال ) منسمه

_________ مافيني اوراق يامحبوبـة اغصانـي

شجرة شجرة



وحدها تجلس على كرسيّ عرش الليل ..

هذا الاسود الفواح لمَّن ينكسر غصن النهار

وتنفطر من مكسره !!

وحدها تخرج ونبع انفاسها ينساب من

فستانها الكحلي..

ومن شال البنفسج ..

كان الاسود شف عن ليلك ..

وشف الليلكي عن ساقها الكحلي ..

وشف الكحلي المعتم عن الازرق ..

والازرق شف عن هذا السديم !!

وشف عن .. ..

عن ..

وجهشت في كرنفال اللون زهرة !!

إسمها ..!!

وتسابقت داخل فمي الاسما .. تباهي في

في سما وجه ( المليكه ) ..!

إسمها بلقيس ..؟!

لا..

زنوبيا ..؟!

لا ..

كليوبترا ..؟!

لا

ملكة الليل ..؟!

هذا ماتقول الناس ..

لكني اسميها :

( حزن زهر البنفسج ..

ضحكة النرجس ..

خجل ورده ..

غرور الياسمين

الفل متواضع .. أسميها ..

واسميها دفا الريحان ..

والشيح النفور ..

وطيبة النعناع ..

أسميها حكاية ( سرْ ) وافشاها النسيم !!

.

رفيف
.




أكتب رفيف وتطيح اربع نجوم وسنا ..

_________ من فوقها نجمتين وتحتها نجمتين .

كتبتها ف ( اول الصفحه ) تساقط جنا ..

_________ كتبتها ف ( آخر الصفحه ) نبت ياسمين .

كتبت فوق السطر مال السطر وانثنى ..

_________ يميل يم اليسار وينحني لليمين

كتبت ( تحت السطر ) وارخيت عيني وانا :

_________ أكتب وتسأل رفيف الشعر هذا لمين .؟!!

.


ماجـــده

تبكي وتضحك على المسرح كما طفله ..!

كما ..؟!

كما ليش هي طفله كما هيه .!!

كما بعد ليش ..؟! عصفور ٍ ترفرف له ..

في بال الاغصان حالة صمت محكيه !!

من صوتها يرجع الغايب على غفله ..

وتطل قمرا ليالي صيف شرقيه .!!

-----------

صيحة


صحت في ( سمع الفراغ )

بالـ( فم المليان ) ..

صيحه ..!!

ياإلهي ..!!

كل ذا الأخطا .. صحيحه ..؟!!



-----------

حــلم

أرى في مايرى النايم ..

سفينة نوح ..!!

وساطور السما ريح ٍ تشق ال ( فوق ) ..

تنهب زرقة المالح ..

وتحت تخيط اساميها الذوات..

الروح ..+

تتكور جسد عايم ..!!

______

بــوح

ياموطني ..

دام الحياه أخذ وعطا ..

خذ واعطني ..!!

---------

جــــواب

انا الآتي

حياتي ..

في ال ( بقيه من حياتي ) !!

________

حــيــرة

مدري أي كتاب ب ( اقرا ) !

مدري الليله !!

انا عن أي شي ب ( اكتب ) ؟!

عن زرافات ( الحريم ) الشاحبات

عن ( ! ) ..

عن العصيان .. أبكتب ؟!

آه .. ي ( أسراب الأفاعي ) !

واليمامات الحزينه !

من يقول ( العقل زينه