تويت
بسم الله الرحمن الرحيم
السلام عليكم ورحمة الله وبركاته
هذا المسلسل لا يمت بتاتاً وألبته
للحقيقه بصله وأحداثها من وحي الخيال
لذا ارجو السموحه ممن يجد أسمه هنيااا
مقدمة المسلسل
وجودي على الجادل ام الجعودي &&& وجودي على الجادل الغشمريه
يا ليت ان جد الغضي من جدودي &&& يا ليت ان عمه حدا والدّيه
حسيبي على كل واحد حسودي &&& يحسد المولع بشوفة خويه
ينساب هذا الصوت من مسجل ددسن موديل 76 موقفه بين بيوت الشعر مفتوح
كبوتها ومرفوعه على عفريته وراعيها فاكن كفرتها المبنشره ويفرس بها
عند صدامها ولابسن له ثوب كويتي أزرق
من ابو قيطان وعليه كوت احمر كاروهات( ابوك يا الشياكه )
وجنبه واحد مرتكي جنب رمثه ويترشف له كاسة شاهي مسرح
مع صوت المسجل ولا دروا الا بالشايب اللي مركوعه يضرب على التنده
ويقول : يااا غراميل الفلس يا هالغراميل اللي ما بكم فايده من يوم تمسون وانتم
حومه بهالليوله تدورون الارانب وبالنهار متركين الحين علموني يا قوقل
أنت ورشيد الفايده منكم وش !!! لا حلال تسرحونه ولا حطب تجيبونه
وما لكم شغله غير هالقرنبع تفكون وتربطون بها اللي ما اني شايف بها
صالح غير هالمسجل المحزم عساه مهو العوض براديي البني اللي
هاكاالنهار دعسه قوقل عساه ما يعقبه بالسواقه بس
مطير عيونه بالزيلان لو يشوف له مخيول غير يدعس اللي قدامه
وهو ما درى عنه
وبعدين هالارمل هذا اللي له دندنه ليه ما تسكرونه هج على حلالنا
كل ما قام يرطن والحلال غدى قطاعين
وانت يا رشيد ما تخلي عنك اتليقطك لكرعانك ومقابلتك لقوقل وتنحدر
مع سالم عيد الهرفي أره يطرونه عند عربنا يقولون ما شاالله مشتري له تايوته
لها نشنشه مهي مثل خردتكم اللي مثل البعير العسيف اللي كل محل
يحرن به
طع شوري وانا عمك أنزعج لتبوك ودور لك على شغلة تستفيد منها
لا يغرك اتبطح قوقل هذا وراه من يصرف عليه
قال قوقل بزعل : ليه يا عمي !!! متوذي منا وحنا كل ليله معشينك لحم
ارنب
لا واخسارة ددسني اللي ما خربها غير قنيصي لك وانت كل
ما طابت لنا الجلسه على الربعه وانت قمت اتشهوا وقلت واحلالاه
يا ردحة الارنب على هالجمر
فقال العم : ما هدم بيتكم علشاني تقنصون !!!
كل طربقتكم هذه أنا عارف الوش
ودكم أتخطبون البنت مار هذا الشي لا تحلمون به لو أنه الحلم وانا عمكم ما طولكم ما
تسنعتم وغدى عند الواحد منكم رعية من الحلال وبيت مقورن ولي شرط
على اللي وده يناسبني يجيب لي راس بدن قرونه بها خمس وثلاثين
فصه وراس ضبعه برقا وراس ذيب أدغم وراس قرطه
وراس أفعى ام جنيب
وترى شرطي هذا مهو بس لكم ترى سبق ان شرطته على زيدان يوم
كان يلولح خرازته كل عصريه ومقابلني على هالمعاميل ويهذ
من هالقصيد
ومن يوم شرطته عليه هالشرط هج من العرب كلها ما ادري وين ديرته
وقبله ناس واجده مسويه نفسها ابوارديه ومن يوم سمعوا بشروطي
سلمت من غثاهم
وهناوقف رشيد وهو يبتسم و ينفض الضريسه المتلولسه بكشته ويطالع
لشايب بعدم ويقول : هاه ياقوقل وش رايك بشروط عمنا تقدر اتجيبها
والا .. لأ ..
أما انا كلها تهون عندي الا هالبدن ... ويزداد سخريه بضحك
ويقول : يا عم ما تطيح عنا هالخمسه وتخليها بس ثلاثين فصه
هههههههههههههههههههه
قال العم : اقول خلوا عني الكركره والخثاريد اللي ما يوافق على
شروطي لا اشوفه يحوم وسط عربنا ورا اليوم
قوقل يحدث نفسه : لا بالله رحت بخرايطها مادام فيها ضباع وذيابه
انا يهج علي الصفير وعمي يقول جب راس ذيب ..لا ..وادغم بعد
قال رشيد: اما أنا أسلم عليكم رايح لسالم عيد ودي اخاويه لتبوك
منحدر معه ودي أدور لي وظيفه كانك خوي لي يا قوقل
مشينا
قوقل : خلاص انا ودي اروح لهلنا ودي أجلب معي جلايب
والحقكم وميعادكم وادي الدرع
ويذهب رشيد لمقابلة سالم واخبره بأنه وده يخاويه لتبوك
فقال له سالم : ماعليه زين أنك لحقت علي انا ماشي الحين
ويركبون حنتور سالم الجديد وينطلقون بالمشي وبالسوالف
والخباوي
قال رشيد : وش بيضا بضبضه تطب الما ولا تخضه ؟؟؟
قال سالم : يا اخوي هذا لغز سهل
قال رشيد : أه سهل ! ياالله علمني وش بيضا بضبضه
قال سالم : ياخوي دور غيره هذا سهل
رشيد تنح وكبرت براسه أن سالم غير يقول له الحل ولا يعترف
له انه عجز عن حله وقال له : وش بيضا بضبضه يا سالم
سالم : أقول خل عنا البضبضه وخذ عندك هاللغز هذا
فقاطعه رشيد لا تقول ولا تزيد وش بيضا بضبضه
هنا أرتفع الضغط عند سالم ودقها لطمه وقال لا وقفنا
أن ما حلها قوقل اعلمك بحلها
هنا رشيد تقل تريح وقال له هات لغزك
قال سالم : أنشدك عن شي تشيله بيمناك واللي يشيله
ما تقدر تشيله
فقال رشيد بهزره شيله ما تشيله خل عنا شيلتك
وش بيضا بضبضه
طبعا سالم فقد شعوره ومسك فرمل بنص الخط وما درى غير
بالصقعه اللي بسيارته من الخلف ويوم نزلوا ولنه قوقل بددسنه محمل غنم
والمسجل يضرب على اخر صوت وجودي على الجادل أم الجعودي
وهنا سالم فتح الباب وطبح واصطبى لسيارته ويوم شاف الصدمه
خطف قوقل مع شوشته وقال يا وجودي انا على سيارتي
اللي معمي عيونك وش
ماتشوف الدرب طبعا بعد المشاده العنيفه بين سالم وقوقل وكلن
طاح من عنده بعد معركه كانت حامية الوطيس نزل رشيد وقال يا جماعة
الخير تعوذو من الشيطان اللي صار صار مير علموني وش بيضا
بضبضه تطب الما ولا تخضه
قال قوقل وهو دوبه ينهت : يمكن ددسني يوم صقعت بسيارة
سالم
قال رشيد وهو يهز سبابة يده لا لا لا مالك لوى
وش عرفك يا قوقل باللغوز
هاه يا سالم وش بيضا بضــــــــبضه تطبـــــــــ
فقطع عليهم الهرج رنين سياره مقبله عليهم ويوم وقفت
والن فيها زيدان وفايز بن رويحل ومعيض و........
....................و............................. .................................................. ...........
.................................................. .................... ستوب كت
بس خلاص
الحلقه الاولى أنتهت
يتبع أن جاز لكم المسلسل
أخوكم أوسكار الهرفي
تعليق