عبدالعزيز الصعب

[POEM="font="Simplified Arabic,5,black,normal,normal" bkcolor="transparent" bkimage="./images/backgrounds/15.gif" border="double,4,black" type=2 line=0 align=center use=ex num="0,black""]الناس واجد فيهم أشكال وأجناس=ونسبة هل الطولات فيهم قليله
تكبر هموم الشهم وتضيق الأنفاس=لو هو مضرّا للحمول الثقيله
ويالضيق لو حطـّيتني بين (الأقواس)= ونيلتها سته وستين نيله
والله لو أضرب عندك أخماس بأسداس =والقلب مابين الجمر والمليله
لأصبر على همّي وأقفل بترباس=من خوف هرّاج الزرا والفشيله
وأشكي لمن يبري من الهم والباس=اللي جعل بالوقت عدله وميله
الراس ماهو ناقص ٍ طيحة الفاس= والفاس ماوالله يميني تشيله
يحلـّها ربي قبل تاصل الياس=وإن قالها الله ماهي بمستحيله
من بعدها صغت المشاعر والإحساس=وآنا عميل الحرف وآنا كفيله
أدلـلـه حتى يجي حرف ميّاس ="يَروى" و"يُروى" والمعاني جزيله
يلبس تحياتي وتقديري لباس=ويبوس راس اللي فعوله جليله
اللي فزع لي عقب ماذقت الأتعاس="عبدالعزيز الصعب" زيزوم جيله
من ساس ناس يلمّهم طيّب الساس=والدين يكسيهم وقار وفضيله
الطيب لأهل الطيب ميزه ومقياس=والصعب للصعبات , محدٍ مثيله
أنا أشهد إنك للرجاجيل نبراس=ذخر وفخر , يا ابن الرجال الأصيله
عليك مني كل ماهب نسناس=أزكى سلام بكل يوم ٍ وليله
يا أنفس أنواع الجواهر والألماس=يامصدر إشعاع الصفات النبيله
عُمر الذهب مايوزن بقيمة نحاس=غالي على مر العصور الطويله
لاهنت ثم لاهنت ياشامخ الراس=ولاهان "سيف" اللي وفا مع زميله
من عاش لبذور الكرامات غرّاس=تزهر بساتينه ويثمر نخيله
ومن ودّع "أم عياله" وسنـّع الناس=هذا على ماقيل "مافيه حيله"
يرجي تجاره رابحه مالها إفلاس=يالله عسى الفردوس دار الحليله
يوم إني مضيّع طريقي ومحتاس=أخذت بيديني وصرت الدليله
والله فلا يوفيك شعر ٍ بقرطاس =كريم وحروفي بحقك بخيله
يجزاك من لاتاخذه غمضة نعاس =اللي شرع دينه وبيّن سبيله
يسقيك من حوض النبي كاس مع كاس=تنهل من الكوثر ومن سلسبيله
قلته وأنا شاعر وللشعر هوجاس=يفخر بمدح مكمّلين الجميله
والناس واجد فيهم أشكال وأجناس=لكن صفات الصعب فيهم قليله[/POEM]