هجوس الشعر

في البدايه اعتذر عن الغياب



واصافحكم بهذه الابيات لعلها تشفع لغياب صاحبها...



هجوس الشعر اذا جتني أروض لجلها القيفان

............... أســـرّج فوقها علمي وانا مدرك معانيها


بجزيل الهرج أنا اعسفها وعودها على الميدان

........... أصيله .. لو يطول الماد ... تبي تسبق بياديها


أعرف الشعر ذا حقه .. وأنا ما نقص الميزان

............ وصية عــــود وصاني .. وانا حافـــظ مباديها


أعز الصاحب الغالي ... وداري صاحبٍ خوان

............ حسيبه ربه الخالق .. انا وشلون ابهديها


رداه يرده العمله .. بذل .. ونقصٍ .. وحقران

........... عليه الميل .. والزله .. تجيه وينكوي فيها


ترى العربان ما تكذب .. اسمع هرجة العربان

........... تموت الحيه الرقطى ... تموت وسمها فيها


ولا تشره . . ولا تزعل .. ووسع خاطر الزعلان

............... ذيابه مابه ذيابه ... ترى كثرت حصانيها


تصبر حيل يا قلبي ... وربك واحدٍ ديان

............... يسهلك دروب الخير .. يهونلك مماشيها


ولا يغرك هوى نفسي .. غروره تتبع الشيطان

.................حد النفس جاهدها ترى مثلك يقديها


ويا مضغه اذا صلحت .. يبي يصلح جميع الشان

............... ويا قلبي عليك اللوم.. بولها .... وتاليها


ولا تظهر ابد همك ... ترى تستانس العدوان

.............. وقول النفس مبسوطه .. ولو كثرت بلاويها


ولزوم تميز العالم .. تعرف الزين .. والتعبان

............... لجل تركي على صاحب لكبرت جاك ينهيها


نداوي .. لا نهض ريشه يسرك منظر الجنحان

.............. وخل البوم في عشه .. لظلماء يستتر فيها


ولا تحزن .. ولا تجزع .. ولا تندم على ماكان

............. ( نصيبك لازم يصيبك) .. حقيقه ارتاح واعيها


ياطير الحزن


يا طير الحزن لا ترفرف .. وانا شجرة بدون اغصان

..... تجي أخمص .. تروح أخمص ... ولا لك عيشةٍ فيها


أنا ببقى وسيع البال .. شمالي والفكر طربان

.............. أدن النجر ... والدله ... أنا عيني تراعيها


وعذري مره اخرى

وتحياتي للجميع