قصيده في أحد الأيام

[poem="font="simplified arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]هات القلم و اكتب تعابير الأمثال =و اكتب ترى القلب هيض غرامه
اليوم قلبي من هموم العنا شال = شال العنا و الهم و الهم ضامه
قلباً غدا للهم مارد و مدهال = واثر عليه و مخطراً في عدامه
أن جيت أبا أرق صار بالقلب ولوال = ما ذاق لذات الكرى في منامه
لامن صديقٍ يوم نشكي له الحال = غير الله أللي عالماً في مرامه
شفت الجفا بالعين ماهو بالأقوال = كلاً يعبر عن ضميره كلامه
ماني غشيماً عارفاً كل الأحوال = و أعرف طريق العز و أعرف نضامه
عارف خراجي كان شفت الدهر مال = ماني ورى المقفين راعي ملامه
السر ما يبدا على كل رجال = اللاعلى أهل العز و أهل الشهامه
اللي معك ياقف الليا حدك الجال = خلك معه وافي و زيد أحترامه
خلك مع أهل الطيب للطيب فعال = و الا الردي قربه يزيد الندامه
شفت الزمان اليوم بانت به أهوال = كلاً يقول الحق عندي سنامه
ناسٍ تقلد ناس فيها المثل قال = مثل الغراب اللي يقلد حمامه
الطيب صعب الا على طيب الفال = والنذل ما يقوى دروب الكرامه
تصعب عليه دروب ذربين الأفعال = لو زاد ماله ما يبين مقامه
النذل مثل الرِس لو جانبه سال = يرجع على ساسه و يكثر هدامه
مشاكل الدنيا عريظات و طوال = ما تنتهي حتى تقوم القيامه
لا تامن الدنيا ترى الوقت ختال = دون المرابح ليت منها السلامه
هذا كلامي و الليالي بالأقبال = يظهر بها الخافي و نعرف تمامه
القول واجد من حرص فيه يهتال = وكلاً على معناه يبني خيامه
وصلاة ربي عد ما هل همال = وعداد من صلى وكمل صيامه
على نبياً وضح الحق مازال = وضح سبيل الخير و الحق قامه[/poem]