_ الحــــــوت _

[poem="font="simplified arabic,5,darkred,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يامسلميـن البارحـة راعنـي حـوت=أقفيـت عَنْـهُ وكنِّـي اقفيـت يـمّـه
يسبح مع الجـوزا وتجديفـه سكـوت=والشمـس فـي جِرْيَانَهـا ماتهـمّـه
له زعنف بصنعـا وزعنـف ببيـروت=ياوسـع مدبـاره وياضـيـق فـمّـه
تزعّمـوا حولـه ثلاثيـن طـاغـوت=واستاسـر بجوفـه مـن الجـن أُمَّـة
على طرف ذيله ثلاث : (الفتى) و(نوت)=و(القاضـي) اللـي لاضميـرٍ وذمَّــه
فـي عينـه الزرقـا تناثيـر ياقـوت=في حِجـر حوريّـة ليـا اقفـى تلمّـه
هذا العجيب اللي لقـا العقـل مبهـوت=كأنَّـمـا تصَّـعَّـد العـيـن قِـمَّــة
ياليتها ماهـي مـن اسحـار هـاروت=أو صـرت لجنـون الليالـي مخـمّـة
ياعم * لاجتـك القصيـدة علـى النـوت=أنـت الخبيـر اللـي يحـلَّ المهـمَّـة
سلطان في لغـزه مكلبـش ومكبـوت=أسيـر قيفـان وسمـع صـوت عمّـه
يافزعـة الخاطـر ويانزعـة المـوت=ياحالة الضيقـة ويـا اشنـع مطِمّـة
يافـارج الكربـة وياسامـع الصـوت=رجواك في حالـي عـن ادنـى مذمّـة
يا ابو فهد صـدر المراسيـل منحـوت=والعجـز فـي جرحـي يقفِّيـه دمّـه
مايشكـي الشاعـر ولكنهـا بـيـوت=ينظـم جُمَلهـا لجـل ينـزاح هـمّـه [/poem]














[poem="font="simplified arabic,5,darkred,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]سلطان متروّع وصايم عن القوت=من هول حوتٍ ياخذ العقل كمّه
حوتٍ يهيل العقل في بطن ساحوت=صعّب علي حلاه ويقول سمّه
لامعطيٍ رمزه ولامعطيٍ دوت=لاشك بسم الله وتزول غمّه
منته بجنب السِيف يالابس الكوت=ولنته بعرض البحر في غب جمّه
الليل مظلم وانت مبعد عن السوت=مبعد عن الأضواء في جنب حمّه
هيّض خيالك عُظْم خلق الملاكوت=ورسمت لوحه بالنجوم المكمّه
بين الجدي وسهيل جدّفت بالبوت=ومابينهن من كون تامم متمّه
أبدعت في رسمك ومافاتك الفوت=هذي حقيقة صدق والقول ذمّه
خلّيتني محتار والفكر مشتوت=كنّي معك لازلت في جزء عمّه
الليل موحش دون رفقه وزغروت=دق الوتر بانغام والطار حمّه
والتمر فالبستان أطيب من التوت=وان مالمست الورد يكفيك شمّه[/poem]

* القصيــد مصافحة ومبادعة بيني وبين الوالد والعم الكريم : مسعد فرج الوثر

.