من حولك عيون للزلات صياده.....وقلوب مثل الليالي سود ومخيفه ...!

[poem="font="simplified arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]

يا الله والدين قبل العرف والعاده=تشريع ... وأعوذ بك من شر تحريفه
رضيت منهاجه استحباب وعباده=ما ودي الصدر يمسي مظلم وجيفه
والشعر دايم يجي من روح قصاده=ويمثل إحساسه .. إن ما تم تجويفه
وأكيد ليت القصايد كلهن ( غاده=المترفه هذي .. وكلن على كيفه
أنا أحْسب أعماق شعري وأحْسب أبعاده=من قبل تركيبه لما بعْد تصريفه
ما همني بالقصيد عيون نقاده=موفي رصيدي ولا به شي أبا أضيفه
شعري جعلت الضمير الحي جلاده=وأكثر همومي هموم كبار ومنيفه
بالمجتمع لي طموح العود بأولاده=واهتم من غيرتي بابسط تواصيفه
وللسان شعري كفلت العلم وإسناده=وللمترفه هذي .. الشعر من اطاريفه..!
هذي نصيحه تلم الشي وأضداده=وأقول فيها بقيض الوقت وبريفه
يا حرف .. يا حرف .. صح الغافل وناده=قله مع النفس يوقف بس توقيفه
خله يعرف أصدقاه ويترك عناده=ترى اخطر أعداه .. ممكن من مواليفه..!
وإذا عصاك وبياض النيه اقتاده=لا تطش همه .. ولا تكسّر مجاديفه
تراه توّه قليّل خبره ..وعاده..=يشرب من الشكل وعيونه مغاريفه
فُطري مفاهيم .. وإنسانيته ساده=ما زوّر إحساسه وكثر تكاليفه
وان شفت لمة وجوه .. تحاول إسعاده=قله ترى ضحكة الرجال .. تغليفه
قل يا سليل الوفا يا تالي أحفاده=احذر من اللي مضامينه مظاريفه
ايّا خوي ارجع لتاريخ ميلاده=وإذا طلع من مواليد الرخا عيفه
ترى الردي لو جلس في مجلس الساده=ديكوره أداة نصب .. وجوهره ليفه ..!
والهيس لو في كلامه فايده .. فاده..!=من يتّبع جرته تكثر تحاسيفه
هرج السعه ما يوسع بال وراده=خلك فَطِن وأطلق الفكر بمشاريفه
تشوف بعض ألسن الأصحاب كداده=وفيهم من لسانه يغطي مصاريفه
كذاب ما يُحسب لعلمه وميعاده=يا حُقْر منزلته .. ويا شين تصنيفه
الكذب زوده نقاص ونقصه زياده=مذموم ويجوز في حالات تأليفه
لا صار خدعه ونار الحرب وقاده=أو صلح متخاصمين وفيه تخفيفه
وأكيد كذبك على اللي عنك نشاده=يجوز صرفه .. إذا الموضوع تصريفه ..!
أما اللي الكذب صاير شربه وزاده...؟=من عزه يسد فاتورة تكاليفه ..!
يا حرف والعلم ثبّت عني أوتاده=ثبّت مضامينه وثبّت تعاريفه
الناس ما هم خرز منظوم بقلاده=أنواع .. ولكل وقت وحال توليفه
والغافل إزهم عليه وحاول إبعاده=عن صحبة اللي ما يرفع سهْم تشريفه
قله وهو شايف إن النذل ما زاده=احذر من العيب لا تاطاك اضاليفه
من حولك عيون للزلات صياده=وقلوب مثل الليالي .. سود ومخيفه ...!





[/poem]