انا موجود انا مهم أنا على رأسي ريشة

وعليكم السلام ورحمة الله وبركاته
وش عندكم هنا
حنا جالسين مثل ماتشوف نشتغل
ادري انكم جالسين اجل واقفين وش عندكم يعني وشو تسوون هنا
مثل مانت شايف ومثل ماهو مكتوب فوق على اليافطة
يعني قالولك ماعرف اقرأ انا قريت اللي على اليافطة بس ابيكم انتم تقولون وشو تسوون
يا اخي حنا مشغولين مثل مانت شايف وورانا الف شغلة وشغلة ماحنافاضيين كل مادخل علينا واحد قلنا له وش نسوي ....وعلشان كذا كتبنا اليافطة اختصارا للوقت والجهد
طيب انت ليش زعلان ؟
انا ماني زعلان لكن ماني فاضي
بس يمكن انت ماعرفتي ؟
لا والله ماعرفتك ولااعتقد أني عمري شفتك
ادري انك ماعرفتني ولو انك عرفتني كان فزيت لي
افز لك كيف مافهمت ؟
تفز لي احترام وتقدير
طيب قول من انت؟
أنا مدير
خير ياطير !!!!
لا انا مدير ادارةيراجعها الف فرد في اليوم
تشرفنا حياك الله اكرم وانعم
لا وازيدك من الشعر بيت انا معروف عني كلمتي ماتثني وشديد ولا دخلت على اي مكان يفزون لي
ماشاء الله زين الله يزيدك من خيره ... طيب أي خدمة مثل مانت تشوف مشغولين
خدمة ايش ابو الشباب انا جاي هنا وانا عازم على شيء مايردني عنه احد انا ما انرد
قول وش عندك؟ ... واذا نقدر عليه من عيوني
ليش يافطتكم لونها اخضر؟!!!
واذا لونها اخضر أكثر لوحات الشوارع لونها اخضر خاصة الدليلية منها !!!!
لا يابوي انا ادير اداره يراجعها 2 شخص واعرف ايش الالوان اللي تاثر على الناس ايش القرف هذا
طيب قول وش اللون اللي ياثر على الناس؟
كم لكم هنا
لنا 3 سنين
غريبة كل يوم امر من هنا ماشفتكم !!!!
علمي علمك
غريبة المفروض اني اعرف بس شكلكم على قد حالكم علشان كذا مانتبهت لكم
يمكن
ما اقول انكم ماتعرفوني يا خوي انا كلمتي ماتثني ولا انت ناسي
لا ياخوي مانسينا.. بس.. قول وش عندك؟
ولا فيه اشياء ماتعرفها بعد ... صب شاي وهات فصفص علشان اقولها لك
اللهم طولك ياروح ياخوي قول وش عندك
اقول الظاهر انك صحيح ماعرفتني ولا ماتكلمني بهذا الاسلوب وشو اللهم طولك ياروح!!!
ياخوي قول وش تبي بالضبط ؟تراني مشغول ومثل ماتشوف الناس هنا عدد 600 شخص وكلهم شغالين يا اننك تقعد معانا ونعطيك شغلة وتقوم فيها زينا ولا ياخوي روح وتعال بعدين
وش هذي طردة؟
لا ياخوي ماهي طرده بس مشغولين.
لا هذه طرده طيب والله ماخليكم والله لجمع المراجعين 3 الاف اللي عندي وخليهم مايذوقونك طعم النوم
طيب...
ولا وفيه شيء ماتعرفه عني بعد اسمي ما اكتبه الا بلون بنك على باب مكتبي واسمي الحركي مهايطه واسم ادارتنا ادراة شئون المهايطه ووزيرنا مهايط المتلايط يمكن ماسمعت فيه !!!
اقول يالله الباب عندنا شغل اهم منك انت وجهك انت في مكان محترم يالله لابارك الله فيك