قصيده إهداء إلى العقيد / عيد بن علي السحيمي البلوي ــ مع التحيه .

أرعد خيال الفكر والشعر همال = سحابته يسبق مطرها رعدها
ينوض بارقها من الجال للجال = نوب أيتقدمها ونوب(ن) بعدها
تنساق طيب ووقعها قدر واجلال = ومن لا يقدمها رجع ماوجدها
واللحيه اللي قدرها فال و عقال = فيها القصايد ترتقي من سعدها
ودام الرجال أزوال . وأقوال . وافعال = الطيبه كل(ن) يقدم سندها
ورد الثناء في سلم الأجواد فنجال = من لايمده نعمة الله جحدها
ودوب أستوى الفنجال من كف رجال = في دلة(ن) ماقالو الناس زدها
من زعفران لهيل لــــ / روقة البال = للصبه اللي ماحد (ن) ينتقدها
أسلم يابو خالد وسم وعلى الفال = تقهو .. والقيفان جتك أبوعدها
لو إن بافعالك مايوفن الأقوال = ومواقفك بالطيب ماحصي عددها
يامحزم اللي باسمك اليا أعتزا نال = ياساس راس المرجله ياولدها
يامزبن اللي حدته ضيقة الحال = يافزعة اللي ليلته مارقدها
ياعيد / ياعقيد / يامتن ماشال = رتبه : وشال هموم من يفتقدها
من يرتفع في رتبته لو وقف مال = ومن يرتفع مثلك بفعله وجدها
كسبتها يامعرب الجد والخال = وأهل الحسد يقضي عليها حسدها
ولاهي غريبه وأنت للجود مدهال = ومن ساس عزوه ماخلق من ضهدها
ربع (ن) لهم مجد وفعايل .. ومنزال = ومكانة(ن) مر الزمن واعتمدها
هم ( السحمه ) والفخر ورثة أجيال = كسبو ( نعم ) والبنيه أرسو عمدها
ويا ( عيد علي فالح ) القاف لو طال = الطيبه تبقى ويحفظ سندها
ويرعد خيال الفكر والشعر همال = وسحابته يسبق مطرها رعدها
بحقايق(ن) ماهي رساله بجوال = أقولها وأعيدها إن قلت عدها



* عايد سالم السميري البلوي
23 / 9 / 1432 هــ