رحله .. الى سوق الغنم ..

ياهلا ومسهلا .. اقلطو ..

أول شي كل عام وانتم بخير ..

اليوم بقولكم سالفتي مع جدي عيسى بسوق الغنم ..

وعقب ماظربنا بالخمس على الغداء
كل العائله متحمسين تقول ماعاد هم شايفين اكل ..

كل واحد يحاول ياكل بكل ماعنده من لياقه ..

انا جالس اناظرهم مستغرب

واقول بيني وبين نفسي .. وراهم اخواني كذا .. لايكون ابوي مسوي مسابقه ولا علموني ..

المهم وانا منسجم مع الموقف مادريت الا ذاك الصوت الجهوري اللي يناديني ..


كاشت يماااال الكسر

قلت سم يا أبو أبوي ..
قال : عندك شي الظهر وانا جدك << بالعاده يعطي اوامر بدون مايشاور ..


قلتله ابد يا ابو الشباب .. مواعد صديقتي بالايميل واذا تبي اسحب عليها لعيونك .. ( وجه وحد
و ده يتصفق)


المهم قال جدي نبي نطمر نشري لنا ذبيحه ..

قلت قدام يقطع ابو صدام .. << تراه قايل ذبيحه ماقال نبي نكشت بالثمامه ..

قال : كفو .. والله اني دايم اقول مالي الا انت

اخواني هنا مدري وش اللي خلاهم ينتبهون .. كلهم جلسو يناظرون لي حاقدين ..


طمر عزيز قال جدي انا فاضي تبي اوديك ..

قاله جدي اركد بس يمال الماحي قبل امس اقولك رح معي تقول لا

عزيز لقط خشته اللي انتثرت بالسماط .. خشمه تحت السلطه .. واذانه ورى مرق الباميا .. وبراطمه ماردهم الا جالون اللبن .:36_1_32v:

المهم رحت لبست الثوب والشماغ

وجيت اتمخطر للمجلس .. لقيت جدي لابس له ثوب من عام الفيل وهو عنده .. هالثوب ماشوفه الا اذا جاء يروح لسوق الغنم .. وحاله استثنائيه يوم عيد الاضحى ..

المهم نطينا بالددسن .. ووينك ياسوق الغنم ..

أول ما لاح في الافق ( متعوب عليها لاح بالافق ) سوق الغنم ..
جتك ذيك السنفونيات اللي تغطي على سنفونيات بيتهوفن ..

تعال شف .. ذا تيس ناط من حوض الموتر ومتعلقه كراعه ..

وذا نعيمي يطاردونه هاج ..

وذا نجدي مسلهم بعيونه يبي يخقق له نعجه

وذا سواكن متمدد وانواع الكسل .. ( ماينلام من السودان وش تبيه يصير ) ..

المهم سفطنا الددسن ونزلنا ..

وبدت رحلة البحث عن سعيد الحظ ..

أول واحد وقفنا عنده كان شايب .. وتعالو شفو هالحوار اللي صار بينه وبين جدي ..

جدي : سلاام عليكم .. بكم هالزين ..


الشايب : هلا ارحب علاكم السلام .. والله يالاخو اني ماثد وكلتهم شعير .. كل اكلهم من البر .. وكل اسبوع وانا مغير مكانهم .. واني مهتم فيهم .. وانهم غاليات علي .. وماحدني على بيعتهم الا الحاجه ..

( لاحظو ان كل هالكلام ومابعد رد على سؤال جدي اللي هو بكم هالزين )

جدي : الزبده ماقلت لنا بكم هالزين ..
الشايب : هذا طال عمرك على 550 .. وتراه طيب .. ولحمته مبروكه ..

جدي : مشاءالله .. شلون لحمته مبروكه مشربينه ماء زمزم ؟؟ خخخخخخخ

انا : جدي تعال بس خل نشوف غيره ..

جدي : بناخذ لفه ونشوف ..

الشايب : يارجال تعال خذ اللي انت تبي .. مانتب لاقي ازين من اللي عندي ..

جدي : وراه مانب لاقي ازين من اللي عندك ؟؟

الشايب : يارجال قلتلك اني مهتم فيهم ..

جدي : ايه واذا صار بنشوف السوق ..

الشايب : بسلامتك .. ( وجه واحد متفشل )

ومشينا .. انا بهالوقت جالس اتلفت يمين ويسار .. اتأمل في مخلوقات الله ..

وجدي كل شوي سافط له عند واحد ويقولب بالغنم ..

وصلنا عند لنا سوداني ..


جدي : بكم ذا يازول ..

الزول : عليك الله هازا بـ 580 ..

جدي : ونهايته يازول ..

الزول : عليك الله خاش عليا بسبعين وداير ابيع بمكسب بزيط ..

جدي : اترك هرجك ذا اشوفه بخمسين والا لا ..

الزول : خاف الله داير تخسرنا ..

جدي : خايف الله وعارفه قبل لا اشوفك .. مير اخلص علينا نقرب الموتر والا لا ..

الزول : مايخارجنا ..

جدي : طيب ستين ..

انا : جدي اذا انك تبيه .. ترى معي عشرين ازودك .. ( احسب جدي عايقه معه عشرين ريال قلت بفزع ) ..

جدي : انت وراك ماتعض لك على شحمه وتسكت

انا : سم طال عمرك ..

الزول : شوف يازول داير تاخزو براس مالو ..

جدي : خمس وستين هالعشره نبي نتقاسمها ..

انا قلت بنفسي وش فيه جدي حجر للزول .. رغم انها مهب العاده يكاسر كذا ..

الزول : غلبتني .. فين العربانه ..

جدي : اطمر قول لسعيدان اخوك جب الموتر ..


الحين عاد بنروح للمصلخ ..

وصلنا للمصلخ .. مير الزحمه واصله للشارع العام .. ونمسك سرى

المهم يوم دخلنا ويعطينا الكرنيه ( كلمه عرفتها من جدي يوم سالني عن الورقه بعدين ) وندخل ونزل الذبيحه يوم شفت الرقم مير 302 .. والسرى توه 117 ..

ياحبيبي يعني ردد يالليل مطولك .. والله ويجلس جدي على الكراسي ويمدد .. وانا اطامر بين الكروش والكراعين والرووس لين طلعت الذبيحه بأكياسها ..

هنا شفت للساعه وانصدمت .. من الساعه 2 الظهر طالعين من البيت والحين الساعه 6 ..


ياساتر اربع ساعات علشان تشتري ذبيحه .. من هنا عرفت ان الشعب السعودي العزيز ماعنده حسن تصرف .. مع وجود الاستثناء طبعا


مايستفاد من الموضوع ..

* لحد يتحمس على الغداء ..

* لحد يتلقيف ويسوي فزعه ومحد طلب منه علشان مايصير له اللي صار لعزيز ..

* اللي بينبسط يخاوي جده لسوق الغنم .. بيشوف ويسمع سوالف ..

* ظاهرة الازمات عند المناسبات ماراح تنحل عندنا يالسعوديين ..

خالص التحايا المعطره بسوق الغنم << خربتها

الله يعطيك العافيه

قصة حلوووووهـ
لاهنتـ
بالعافية
<< ينتظر كيس لحم
هههههههههههههههههه

هههههههه
عايش يعطيك العافيه وربي اللي خلقني
صار لي مثلك الا شوي
بس الله يعين الحياه تجارب.... مع تحياتي .... رضا الجحرش

عايش سالم البلوي
الله يعطيك العافية على القصه الرائعة والتي عشنا فيها سويا

ودمت في خير

عايش البلوي
اه دا يله
كاتب قصصي رائع
دمت بخير